PM Modi-i South Korea semdangtsü

New Delhi, February 14 (Agencies): Taruba hopta Ato kilonser, Narendra Modi-i South Korea linük semdangtsü, aser iba mapang nung pai South Korea Tir, Moon Jae-in den linük ana tesendaktep akhangshitsü atema onük aika nung o lemteptsü aser pai Seoul Peace Prize agizüktsü.
Ato kilonser Modi February 21 nü Seoul yimti tonga aotsü, aser pai linük ana tesendaktep onüktem reprangshitsü, ta Ministry of External Affairs-i sangdong ka nung metetdaktsü.
“Iba ya ajanga regional aser international onüktem reprangshitsü atema maongka angutsü, koba ajanga linük ana tsüngda strategic partnership tashi itshitsü,” ta sangdong nung shia lir.
February 22 nü Seoul Peace Prize Cultural Foundation-i sentong ka ayongzüka Modi nem 2018 Seoul Peace Prize agutsütsü.
Yaküm July ita nung South Korea Tir, Moon-i India semdangba aser November ita nung Korea Tir kinüngtsü, Kim Jung-sook-i Ayodhya nung Deepotsav sentong nung shilem agiba sülen India aser South Korea na tesendaktep tajungba akum, ta Ministry-i metetdaktsü.
Tang Modi-i South Korea semdangba ajanga ‘Act East Policy’ dak sendakba nung India-i South Korea den onük aika nung tesendaktep akhangjungshitepnüba sayur, ta kasa sangdong ajanga metetdaktsü.