PM Modi-i ‘süngo ayok saka linükbo mayok’ ta ashi

Rajkot, November 27 (Agencies): Hombarnü Prime Minister, Narendra Modi-i Gujurat nung asssembly elections atema nüboyimba sentong tenzükdang pa den toktepertem aija jembi.
Bhuj aser Rajkot dena pai tanü tesem aika nung o jembi aser iba mapang pai Congress dang pa sensak tia nungi aruba atema melutsütsü metetdaktsü.
Modi-isa Aam Aadmi Party anema jembidang, “iba party yagi tim mesüi inyaktsü aser jena aotsü ta asür” ta ashi.
Rajkot nung nüboyimba sentong ka nung jembidang Prime minister-i, opposition party-i pa memeimer kechiyong pa sensak tia nung intetba nisung ka lir ta ashi.
Congress-i “chai wala” ta jembiba atema Modi-i “Ni süngo ayok saka ni linükbo yoka machi” ta o meyiptsü.
“Ni sensak tia nung lia intetba atema Congress-i ni memeimer. Party ka iba amai tenüng menük agitsü na? Hao, sensaker kibong ka nungi nisung ka PM kümogo. Parnoki iba kuliji magizükteter. Hao, ni süngo ayok saka linükbo yoka machi” ta Modi-i ashi.
Modi-isa demonetisation onük atema Congress anema jembi aser pai ashiba agi sensakertemi parnok tangutsü tim angutsü.
“Congress-i demonetisation atema mepelar. Parnoki ni anema jembiba manener, saka ni Sardar Patel asoba li kasa nung soa ain ta ni parnok dang shinür. Sensakertemi pei tangutsü tim angutsü atema ni inyaktsü. Iba linük auyadaktsüba anendaktsütsü” ta paisa metetdaktsü.
Congress-i Sardar Vallabhbhai Patel mezüngmeshir. Gujurat nung alirtemi parnok ne tatok agütsü saka joko mezüngmeshiba maremzüktsü, ta Modi-isa ashi.
Congress vice president Rahul Gandh-i Doklam mangatettep ken o adokdang Chinese ambassador dak azüitba atema Bharatiya Janata Party (BJP) lennirisa Rahul aitsü.
BJP-i Gujurat assembly elections nung toktepbaji terenlok onük atema dang lir. Khuret ajak atema telatetbaji terenlok lir aser terenlokji maneni alitsüla. Onoki Gujurat nung alirtem atema maneni inyaknür, ta paisa metetdaktsü.