PM Modi-i ‘Superman’ ama benshir: Tarun Gogoi

New Delhi, February 24 (Agencies): Bodhbarnü Assam Chief Minister, Tarun Gogoi-i, Ato kilonser, Narendra Modi-i ajak inyakettsü ama ‘superman’ jilu benshir aser taoba mapang UPA sorkari tenzükba project tem atema tenüng tajung agir, ta aitsüogo.
Tanü New Delhi nung osangbenertem senden ka nung jembidang Congress lenir Gogoi-i, tawa Ato kilonser Modi-i Assam nung sen crore 10,000 indang gas cracker unit ka lapoktsüba densema project aika tenzüktsüogo, ta ashi.
“Modi-i tesüiba küm ana nung ajak inyaker ama sayur. Pa ya ainketer ka ama aser superman ama sayur. Ajisüaka item project ajungaji UPA yimsüsüba mapang nung benok,” ta pai ashi.
Arishi küm 79 CM-isa, Modi ya, mezüng Ato kilonser Jawaharlal Nehru bo toktsür par BJP Ato kilonser AB Vajpayee nem-a tenüng tajung magütsünüba ‘super marketing manager’ ka mesüka lir, ta ashi.
“Saka mapa ajak nungbo iba jagi mapa meinyaker. Bihar nunga meinyak, aser Assam (assembly election) nunga meinyaktsü. Congress-i tangar den meloktepi majority angutsü,” ta paisa ashi.
Gogoi-i, taruba election nung Congress-i BJP tamakok ngudaktsütsü aser BJP chief minister candidate, Sarbananda Sonowal ji pa den medemdangtsü makok, ta ashi.
“Kü raraji Sarbananda anema masü saka Modi anema. Ni rarabaji Hindutva anema aser NDA sorkari Assam aser northeast state tem dang tim mesüi benshiba anema lir,” ta pai ashi.
Mapang ka nung pa den atongsema inyaksang, Himanta Biswa Sarma BJP nung adenba ajanga Congress jenjang majungtsü asü ta asüngdangba langzüdang Gogoi-i, “Sarma-i Congress toktsübaji Congress atema meimlaba temoatsü ka asütsü,” ta ashi.
“Himanta ji BJP atema atakatem ka asütsü aser party nem teraksatsüba bener arutsütsü,” ta paisa ashi.