PM Modi-i takar kibong 50 atema sen notes anentsü: Rahul

Belagavi, December 18 (Agencies): Tanü Congress lenir, Rahul Gandhi-i, Ato kilonser, Narendra Modi-i kanga takar kibong 50 dang loan agiba meyipa agütsütsü atema sen notes anentsü, ta aitsü.
Belagavi nung Congress nung inyakertem den jembidang Rahul-i, sen tamshidak anentsüba ajanga black money anentsü, ta Modi-i jembibaji shitak asü? ta asüngdang.
“Black money ji kong ali? Ibaji, sensaker aluyimertem, aayangertem, mesüra tanü poksüng alir kibongtem ket nung masü saka kanga takar kibongtem ket nung lir. Nenoki parnok (sensakertem) ki mita ora parnok kidang iba senji mangutsü,” ta Congress tatong Tir, Rahul-i ashi.
Rahul-isa, “Iba linük nung auertemji kanga tesangra, ibayongji parnoki hon, kiojen aser tanga osettem nung senji intokogo. Black money shilem 6 dang cash nung lir, tanüngba shilem 94 jibo kiojen aliba nung intokogo. Iba ya Ato kilonseria shiogo. Ajisüra kechiba pai kiojen nung sen intoker shilem 94 ji doktsür black money alir nisung shilem 6 arishir, aser kechiba pai nütsüng shilem 99 timtemdaktsür?” ta asüngdang.