PM Modi-i takok meshitsü memeshitsü: Congress

New Delhi, Luroi/August 29 (Agencies): RBI-i sen 500 aser 1,000 demonetizing sülen jentokba sen shilem 99.3 bo banking system-i meyipa aruogo, ta ashiba sülen linük ashioktsüba atem Ato Kilonser Narendra Modi dang tatok meshitsü asoshi Congress-i akhang.
Centre aija opposition party-i ashiba agi, Yimpoksüi/Nov 8, 2016 nü PM Modi-i ajungbena demonetize asütsü sangdongba ajanga linük kanga akoksaogo. Taoba finance minister P Chidambaram-i ashiba agi, demonetization sülen business balala shibangba ajanga mapa lakh aika samaogo aser nisung taküm 100 dak tema samaogo.
Indian economy GDP growth nung shilem 1.5 takoksa alu koba küm ka nung lakh crore 2.25 lir, ta paisa ashi.
Congress party o tongdar Randeep Surjewala-i ashiba agi, 2017 küm Independence Day nung o jembidang Ato Kilonseri mejangjaba sen lakh crore 3 system-i meyipa arutsü ta ashi.
“Modiji nai iba atema tatok meshitsü asü?” ta Surjewala-i asüngdang.
“RBI report ajanga demonetization ya Modi-i puratetba tamakok tuluka ta jangjatsüogo,” ta paisa ashi.
Reserve Bank of India-i mapang talangka agia bank nem meyiptsüba sen azüngba sülen tanü junked notes shilem 99.3 banking system-i meyipa aruogo ta sangdonga liasü.
Yimpoksüi/November 8, 2018 nü sen tejentem nokdangtsü sangdongba mapang sen 500 aser 1,000 ajak agi sen crore lakh 15.41 shi amshia aliba nungi sen crore lakh 15.31 bo meyipa aruogo.
Iba tetezü jendokba sen crore 10,720 dang system-i meyipa maru.
Maneni Chidambaram-i Tweeter ajanga, sen lakh crore 15.42 nungi sen crore 13,000 dak alaka ajak RBI-i meyipa aruogo, ta ashi.
“Sen lakh crore 3 bo meyipa marutsü aser aji sorkar asoshi tajangzük asütsü ta shibai ashir bilemtetang,” ta pai PM Modi aija ashi.
“Sen samaba aser raksaba densema crore 13,000 ya timba ka Nepal aser Bhutan nung alitsü ta temulung melemi bilemer,” ta paisa ashi.
“Anungji sorkari sen crore 13,000 demonetize sütsü aser iba ajanga linük kanga akoksaogo. Iba dak sendakba nung nisung 100 dak tema taküm samaogo. Ayanga chiyonger crore 15 hopta aika kangshia aruogo. SME units meyirejang aika shibangogo. Mapa lakh aika raksatsüogo. India economy GDP nung shilem 1.5 tajemba aküm, aser iba ajanga küm ka nung lakh crore 2.25 takoksa alu,” ta paisa tweet asü.