PM Modi-i tatok meshitsüla: Opposition

New Delhi, November 25 (Agencies): Sen tamshidak anentsüba onük nung Ato kilonser, Narendra Modi-i opposition aitsüba atema pai tatok meshitsüla ta takhangba agüja tanü Hokolbarnü agi anogo tenetnübuba Lok Sabha senden thinenogo.
Ato kilonser senden nung adentsüla, ta takhangba agüja Opposition züngsemtemi, Ato kilonseri kima nung opposition maitsüi Parliament nung jembitsüla ta yimyim ayima liasü.
Tanep senden tenzükli Lok Sabha Speaker, Sumitra Mahajan-i, asüng Constitution Day amongtsü ta metedaktsüba den külemi kiralongrartemi Mumbai amakba sülen küm 8 ajungba indang metetdaktsü.
Tanep sentong ka nung Ato kilonser, Modi-i opposition aitsüba dak sentakba nung Lok Sabha nung Congress lenir, Mallikarjun Kharge-i, “Tangbo adjournment motion ji onok takhangba masü. Pai (Modi) Opposition-i black money pusemer ta jembiogo,” ta ashiba sülen opposition party balala nungi züngsemtemi sabangleni oa Ato kilonseri Lok Sabha nung sangdong ka agütsütsüla, ta takhangba agütsü.
Opposition züngsemtem jagi, “Ato kilonser, sendeni arung. Na tasütait süra senden nung jembiang,” ta yimyim ayim.
Iba sülen Speaker-i, senden akatsü atema opposition-i meyariteper ta shir minute 35 senden thinen.
Ano tanaben senden tenzükdanga opposition züngsemtemi longkak ait.
TMC lenir, Sudip Bandhopadhyay-i, Modi-i jembiba o ajanga opposition melung yirutsüogo, anungji pai item o meyipa agitsüla aser tatok meshitsüla, ta ashi.
Congress züngsemtemi Kharge o jembitsü melatsü mepishiba magizüki Speaker-i, “Nenok yangjisa alitsü, yimyim ayimang, kaket shisa ang aser o-a jembiner. Ni ibaji memelatsü,” ta ashi.
Iba sülen Congress, TMC, Left aser RJD züngsemtemi maneni yimyim ayima longkak aitba ajanga Speaker-i anogo piyong atema senden thinen.