PM Modi-i Union Cabinet shimshitsü

New Delhi, May 27 (Agencies): Hokolbarnü Bharatiya Janata Party (BJP) Tir, Amit Shah-i kobi melii Ato kilonser, Narendra Modi-i Union Cabinet melenshia tejak tasenpur shimtsü, ta metetdaktsüogo.
Tanü Delhi nung aliba BJP headquarters nung osangbenertem den jembidang Shah-i, “Kobi melii Cabinet shimshitsü. Anogobo ano melemtet,” ta ashi.
Narendra Modi-i aniba NDA sorkar yimsüsüba küm ana ajungba mapang ka nung Union Cabinet shimtsü osang ya temai adoker.
Party osang ajanga ashiba agi, Modi’er sorkar nung mapa junga majeter minister kar anentsütsü aser cabinet nung tasenpur kar shimoktsü.
BJP osang ajangasa ashiba agi, June mezüng hopta nung cabinet shimshitsü akok.
Tawa Sarbanand Sonowal Assam Chief Minister akümba sülen pa melen Minister of state for Sports (independent charge) tasen shimtsü.
Arun Jaitley, Rajnath Singh, Sushma Swaraj aser Nitin Gadkari nungerbo maneni pei Cabinet portfolio abentsü ta osang angazüker.