PM Modi-i US semdangtsü aser UNGA senden nunga jembitsü

New Delhi, Rongjui/September 19 (Agencies): September 21, 2019 nungi tenzüka Ato kilonser, Narendra Modi-i United States semdangtsü aser anogo tenet tsüngda pai US Tir, Donald Trump ajurutsü aser United Nations General Assembly (UNGA) senden nunga jembitsü, ta Brihostibarnü Foreign Secretary, Vijay Gokhale-i metetdaktsü.
Honibarnü Ato kilonser Houston tonga aotsü. Iba sülen anogo ka lir Houston nung Indian-American sensotem den ‘Howdy Modi’ rally agitsü aser iba sentong nung US Tir Trump-a adentsü.
Gokhale-i, “September 21 nikongdang nungi September 27 tashi Ato kilonser, Narendra Modi-i US semdangtsü. Pai Texas nung Houston semdangba sülen New York semdangtsü sentong lir,” ta metetdaktsü.
September 27 anepdang Modi-i UN General Assembly senden nung jembitsü, ta Foreign Secretary-isa metetdaktsü.
Alima linüktemi Mahatma Gandhi sor küm 150 ajungba benjung amongba nüngtem nung Ato kilonser Modi-i September 24, 2019 nü ‘Leadership Matters: Relevance of Gandhi in the Contemporary World’ sentong ayongzüka agitsü aser iba sentong nungji linük ishika nungi lenirtema adentsü.