PM Modi-i Varanasi Lok Sabha menden nungi tokteptsü

New Delhi, March 09 (Agencies): Tanü Delhi nung BJP Parliamentary Board senden amen aser iba mapang nung taküm-a Ato kilonser, Narendra Modi Varanasi Lok Sabha menden nungisa toktepdaktsütsü atema telemtetba agiogo, ta osang ka ajanga metetdaktsü.
BJP indang telemtetba agiba tentet tuluba Parliamentary Board-isa, Lok Sabha election jakdang Jharkhand nung All Jharkhand Students Union (AJSU) den lokteptsü atema telemtetba agiogo.
Jharkhand nung BJP-i menden 13 nungi tokteptsü aser AJSU tongti, Sudesh Mahato nem menden ka anünga yutsü.
Senden tembangba sülen osangbenertem den jembidang BJP General Secretary, Bhupendra Yadav-i, “Lok Sabha elections nung Jharkhand nung BJP-i menden 14 nungi menden 13 nung tokteptsü aser AJSU-i tanüngba menden ka nungjagi tokteptsü,” ta metetdaktsü.
BJP telung osang ka ajanga ashiba agi, AJSU tongti aser taoba mapang Jharkhand Deputy Chief Minister, Sudesh Mahato nem Ranchi parliamentary seat menden agutsütsüa akok. Tang iba menden nungi MP ji BJP nungi Ram Tahal Choudhary lir.
Kasa senden nung taruba election atema terenemshiba asadang aser asalentongtem reprangshia liasü.
BJP lenir kati, “Party-i terenlok onüktem nung ajemdaker election nung tokteptsü lemtetogo,” ta metetdaktsü.
Kasa senden nung party ticket alemtsü atema jembi, aser iba mapang nung arishi küm 75 dak temapur nem party ticket agutsütsü asü magutsütsü, iba atema-a o lemtepa liasü.