PM Modi indang BA degree yimjak nung sangdongtsüla: Kejriwal

New Delhi, May 05 (Agencies): Brihostibarnü AAP tongti lenir aser Delhi Chief Minister, Arvind Kejriwal-i shidi ka ajanga Delhi University (DU) Vice Chancellor, Yogesh Tyagi dang Ato kilonser Narendra Modi indang BA degree ji yimjak nung sangdongdaktsüner, ta mepishiogo.
Shidi nungji Kejriwal-i, “Ato kilonser indang degree dak sentakba documents ajakji  university website nung inoktsü nung tajungba asütsü,” ta shia lir.
Kejriwal-isa Modi indang election affidavit nung pai Delhi University nungi Bachelor of Arts degree anguba indang zülu aliba atema jembi.
“Iba linük nüburtemi par Ato kilonserji tazüngba koba tashi ali’ar metetner,” ta AAP tongti leniri ashi.
Yashia Kejriwal-i, Delhi University nungi Modi-i BA degree ngua mali, ta jembia liasü.
Pai, osangkaket kar nung Modi indang degree sayubaji taila, Delhi university nung iba dak sentakba degree mali, ta ashi.
2014 Lok Sabha election atema Modi indang affidavit nung pai pa ket nung undergraduate aser postgraduate degrees napprong lir ta shia lir.
Affidavit nungji pai, 1978 küm Delhi University nungi pai distance education coure ajanga Political Science tembanga azüng ta shia lir.
Kasa shidi nung Kejriwal-i Tyagi dang, Modi ket nung BA degree melira pa ket nung MA degree jia malitsü, ta shia lir.
“Gujarat University-i pa (Modi) yangji MA agi ta ashir. Ajisüaka pa BA degree-a melira kodaser pa MA atema admission agitet (?) Iba ya süoki ia agitsü onük ka lir,” ta Kejriwal-i ashi.