PM Modi India-ASEAN senden nung adentsü

New Delhi, November 09 (Agencies): November 12, 2017 nü Ato kilonser, Narendra Modi Philippines linüki aotsü aser November 14 nü India-ASEAN aser East Asia summits nung adentsü; iba mapang nung tanga linüktem den shishilembaba aser investments densema tongtibang onük aika nung o lemteptsü.
Brihostibarnü external affairs ministry-i iba osang sangdonga liasü.
Ministry nung Secretary (East), Preeti Saran-i, India-ASEAN Summit nung India aser Association of South-east Asian nations (ASEAN) linüktem tsüngda shishilembaba aser investment nung tesendaktep reprangshitsü, aser tanga onüktem nunga o lemteptsü, ta metetdakltsü.
Ministry ketdangsertemia, item senden nung Ato kilonser, Narendra Modi-i tanga linüktem den-a jurila senden amentsü sentong lir, ta metetdaktsü.
Mongolbar aonung Vietnam ambassador to India, Ton Sinh Thanh-i India-Asean linüktemi onük aika nung inyaktsü atema ajungshiba den külemi India ya Vietnam’er adianu lir, ta jembia liasü.
New Delhi nung senden ka nung jembidang Ton-i, Vietnam Ato kilonseri linük tenüng nung “Special Asean-India Summit” nung adentsü, ta metetdaktsü.
Sangküm January ita nung India Republic Day benjungmong amongdang India-Asean partnership küm 25 ajungba nüngtem nung India-i Asean linük 10 nungi tongtibang lenir aika jaoktsü sentong lir.
India ama Vietnam linükia tamalen China den arrtsü onük nung raraogo aser maneni tzüyim dak sendakba nung iba linük den mangatettep lir.
Vietnam ya-a ASEAN nung tongtibang züngsem ka lir aser parnoki Hanoi yimti nung US Tir, Donald Trump agizüktsü renemdar.