PM Modi, linük tonga aruogo

New Delhi, Tsüklai 12 (Agencies) : Ato kilonser, Narendra Modi-i Palestine, UAE aser Oman linüktem semdangba sülen tanü linük tonga aruogo, pa tayimtsü anenzükba mapang nung External Affairs Minister, Sushma Swaraj-i pa agizüka liasü.
Tentonü Ato kilonser, Modi-i, pai Oman semdangba aser totzü jenti aliba linük nung tongti lenir ajurua senden amenba ajanga iba linük den lenla aika nung tesendaktep tajungba akumtsü, ta metetdaktsü.
“Ni Oman semdangba ya ni tarutsü nunga mapang talangka bilemtettsü,” ta pai twitter ajanga metetdaktsü. Pai anogo ananü Oman semdangba mapang nung linük ana tsüngda defence nung amalitepa inyaktsü densema onük 8 nung tezüngzüktep agiogo.
“Ni Oman semdangba ajanga asen (India-Iran) nüburtem küm aika tesendaktep yanglushiogo, aser ibaji ajanga shishilembaba aser investment na densema lenla aika nung tesendaktep tashi itshitsü,” ta Modi-isa metetdaktsü.
Paisa Sultan aser Oman nüburtemi nungita temeim sayuba atema pelaba shisem.
Amongnü aonung Modi-i Sultan Qaboos den onük aika nung o lemtepa liasü, iba sülen linük anati civil aser commercial onük nung amalitepa inyaktsü densema tezüngzüktep ti agi.
Ano külen pai Gulf nung küm 125 tain Shiva tekülem ki nung sarasadem aser nüngtugu, Sultan Qaboos Grand Mosque-a semdanga liasü.
Pai mezüngbuba nung Palestine aser UAE linük na semdangba sülen tesüsa Oman semdanga liasü.