PM Modi & Lt Gov. na kechi inyaka liasü (?): Kejriwal

New Delhi, October 17 (Agencies): Tan hopta tsüngda Delhi nung tetsür chanu asem tashiyim amshia raksatsüba atema tanü Delhi Chief Minister Arvind Kejriwal-i aitsüba den külemi pai, yimti nung tetsürtem kümzüka litettsüsa Delhi police-i kecha meinyakteter ta shia Centre sorkari Delhi police ji state sorkar nem agütsütsüla ta maneni khangogo.
Tetsürtem anema inyakbatem nokdangtsü asoshi Ato kilonser, Narendra Modi aser Lieutenant Governor, Najeeb Jung nati kechi mapasa inyak (?), ta pai asüngdang.
Yashi tanur ana tashiyim amshia raksatsüba sülen tanü pai tanur anaji ajurutsü lia twitter ajanga pai, “Tila tanur maneni tashiyim amshia raksatsüba ya taktsüka aser shisabulutsü ka lir. Nübortem kümzüka ayutsüba mapa nung Delhi Police-i khenyongi tamakok nguogo. Ato kilonser aser par LG na kechi repranga liasü,” ta ashi.
Hospital-i oa tetsür chanu anaji ajuruba sülen Kejriwal-i, iba ken o nung Ato kilonser aser Lt Governor Jung nati senden ka ayongzüktsüla ta ashi.
“Ato kilonseri Delhi Police ji pa kübok yunüra, pai ibaji langzütsüla. Ni Ato kilonser dang mapang ka azüngteta LG ajurua Delhi nung tetsürtem anema inyakbatem asoshi jembitsü mepishir,” ta AAP tongti lenirisa ashi.
Kejriwal aser par party, Aam Aadmi Party-i aiben Delhi Police aija arur iba den külemi Delhi Police ji state sorkar nem agüjang ta takhangba agüja arur.
Delhi nung arishi küm pezü tetsür chanu ka tashiyim amshia raksatsüba den reshikangshiba sülen anogo ishika lir Hokolbar nü-a Delhi nung tetsür chanu ana loktii tashiyim amshia raksatsüogo.
West Delhi, Nangloi tesem nung tebur anati arishi küm ana ser tesadang tetsür chanu ka lar kima nungi anizüker oa tashiyim amshia raksatsü. Kasa aonung Delhi, Anand Vihar tesem nunga tebur asemi arishi küm pongu tetsür chanu ka tashiyim amshia raksatsüogo.