PM Modi, MP temi Hamid Ansari nem tenüngsang agütsü

New Delhi, August 10 (Agencies): Brihostibarnü Rajya Sabha züngsemtemi mendenbuba, Hamid Ansari nem tenüngsang agütsü, iba den külemi Ato kilonseri den tongtibang lenirtemia Ansari-i linük temzüngtem kübok inyakba atema pa nem tenüngsang agütsü.
Linük tatong Tir Ansari nem tenüngsang agüja Modi-i, linük temzüng wazüka inyaktsü atema Rajya Sabha mendenbuba ama pai junga inyakogo, ta metetdaktsü.
Modi-isa, Ansari-i yimsüsüba nung aika ajangshia aliba ajanga Rajya Sabha timi ketdangsüogo, iba den külemi aiben pa-a ajangzükogo, ta metetdaktsü.
Ato kilonserisa, Ansari’er kibong ya küm 100 dak tema nübur tenzükba nung inyaka arur, ta ashi.
House Leader aser Union finance minister, Arun Jaitley-ia, “Iba House nung tanü ya kanga tongtibang anogo ka lir. Iba House nung na küm 10 junga Mendenbuba inyakba sülen tanü onoki nü den tepila salem lemsateper,” ta ashi.
Opposition lenir, Ghulam Nabi Azad-ia Ansari-i House junga ketdangsütetba atema tenüngsang agütsü.
Ansari den mapang talangka inyaksema aruba bilemteta Azad-i, linük aikati Ansari nem honorary degrees aika agütsüogo, ajisüaka pai itemji kodanga mamshi, ta ashi.
SP nungi MP, Ram Gopal Yadav-ia, Ansari-i bendangshidang mesüi House ketdangsüogo aser rongrong liabo kodanga ozüng agizüktsü memela, mendenbuba tasenbaia kasaji inyaktsü imlar, ta metetdaktsü.
SP nungi MP, Ram Gopal Yadav-ia, Ansari-i bendangshidang mesüi House ketdangsü aser rongrong liabo kodanga ozüng agizüktem memela, mendenbuba tasenbaia kasaji inyaktsü imlar, ta metetdaktsü.
Trinamool Congress lenir, Derek O’Brien-i, Ansari-i temang anema alitsü atema yoga exercise agir aser nikongdang shia jajaa senzür; tesüiba küm 40 tashi pai ‘sandwiches’ chia arur; iba ya “world record” ka asütsü ta ashi.
Paisa Ansari-i Rajya Sabha nung nikongdang 5:00 ako nungi 6:00 ako tashi mapang tali mapa inyakba atema tenüngsang agütsü.