PM Modi nem Chinese oshi nung tezüluba aser noksa sempet agütsü

Hangzhou, September 04 (Agencies) : Deobarnü China nung Prime Minister, Narendra Modi nem China nunger painter kati yangluba noksa den Bhagavad Gita aser Swami Vivekananda indang essay tezüluba kar sempet agütsü.
PM Modi-i G20 summit nung adentsü atema Hangzhou yimti tonga arua lir aser iba mapang Indophile Professor Wang Zhicheng-i pa nem Chinese oshi nung züluba sempettem agütsü. Professor Wang-i Peking University nung Hindi sayur.
Chinese oshi nung meyipzüka zülubatem rongnung Patanjali indang Yoga Sutras, Narada indang Bhakti Sutras aser Yoga Vasistha tem dena lir.
“Temeyipzükba tasentem, sobaliba tejentem! PM @narendramodi nem Chinese oshi nung züluba sempet kar agütsü,” ta External Affairs Ministry otongdar, Vikas Swaru-i Twitter ajanga metetdaktsü.
Hangzhou kübok Zhejiang Kaiming Art Gallery nung Professor, Shen Shu-i yangluba noksa ka Prime Minister Modi nemsa sempet agütsüogo.
Modi indang noksaji ita pezü agia yangluba liasü, ta Swarup-isa Twitter nung metetdaktsü.
PM Modi-i anogo ananü atema Vietnam semdangba sülen Honibar aonung China tonga aru.