PM Modi sentong atema Bihar nung süngdong 500 shi alen

Patna, October 24 (Agencies): November 1 nü Ato kilonser Narendra Modi-i BJP-i aniba NDA atema Bihar assembly election nüboyimtsüba sentong ka nung jembitsü asoshi Madhepura district nung süngdong noklang aika lensükogo, ta Honibar nü district ketdangsertemi ashi.
“Modi-i election nüboyim sentong ka nung jembitsü atema BP Mandal University campus tesem tuluba akümtsü asoshi süngjanglijang atangba süngdong densema süngdong aika atsütok aser lensükogo,” ta ketdangser kati ashi.
Süngdong noklang aika lensükba osangji mezüng Madhepura nung aliba Madhepuratimes osangkaket ajanga sangdonga liasü.
Iba osangkaket nung yimobilem zülur, Rudra Narain Yadav-i, süngdong 400-500 jungnüa lensükogo aser süngjanglijang atangba süngdong densema süngdong tapu balala 1,000 dak tema atsütokogo, ta ashi.
Iba dak sentakba nung Madhepura District Magistrate, Mohd. Sohail-ibo osangbenertem den kecha jembitsü memelung.
Alima süngdonglidong wazüka ayutsü atema inyaker Ranjeev-i, “Election nüboyim sentong ka atema süngdong noklang aika lensükba ya tejashitsüka,” ta ashi.
“Iba osang ya tejangja, linük nung alima tzümepong atema tebilemtsü kanga makar Modi nüboyim sentong atema süngdong aika tenlaogo,” ta Ranjeev-i phone ajanga IANS osangbenertem dang ashi.
Iba tesem nung alir lanur ka tenüng agi Sanjeev Kumar-i, “Onoki lungkak aita onok tejashi sayuba dak alaka kecha mesütettsü,” ta ashi.
Ano University tesayur, BN Viveka-ia, iba senden akatsü asoshi university campus melaogo saka süngdong alentsü atemabo memela, ta ashi.
Iba dak sentakba nung BJP district Tir, Anil Kumar Yadav-i district ketdangsertem dang, election nüboyim sentong makadang aser akaba sülen teraksatsüba lira party-i iba melen sen agütsütsü, ta shidi ka ajanga shiogo.
Mapang mapang shia Bihar Chief Minister Nitish Kumar-i Bihar nung süngdonglidong aliba tesem tuluba akümtsü atema jembia arur aser Bihar state-i tesem ajak nung süngdonglidong melema akümtsü asoshi merangba mapang ka nung iba osang ya angashir.