PM Modi, Sonia, Manmohan nungeri Indira Gandhi nem akhüm agütsü

New Delhi, October 31, 2019 : Brihostibarnü New Delhi nung Congress Tir, Sonia Gandhi-i taoba mapang Ato kilonser, Indira Gandhi nem akhüm agütsüba noksa nung angur.

New Delhi, October 31 (Agencies): Brihostibarnü Ato kilonser, Narendra Modi-i taoba mapang Ato kilonser, asür Indira Gandhi asüba anogomong nung la nem akhüm agütsüogo.
Twitter ajanga Modi-i, “Taoba mapang linük Ato kilonser, Indira Gandhi asüba anogomong nung la nem akhüm agütsür,” ta ashi.
Union Home Minister, Amit Shah-ia Indira Gandhi sür küm 35 ajungba anogomong nung asür nem akhüm agütsü.
Ano Congress Tir, Sonia Gandhi, taoba mapang Ato kilonser, Manmohan Singh aser BS Hooda nunger densema Congress lenir aikati linük yimtiba nung aliba Shakti Sthal semdanga asür, Indira Gandhi nem akhüm agütsü.
Congress lenir, Rahul Gandhi-i taoba mapang Ato kilonser Indira Gandhi nem akhüm agütsü.
“Kütsü (otsüla) aser taoba mapang Ato kilonser, Indira Gandhi-i taküm bendanga agütsüba anogomong nung la nem akhüm agütsür,” ta Rahul-i twitter ajanga metetdaktsü.
West Bengal chief minister aser Trinamool Congress tongti, Mamata-ia asür nem akhüm agüja twitter ajanga, “Taoba mapang Ato kilonser asüba anogomong nung la nem akhüm agütsür. Lai India atema mapa tajung inyakba aser 1971 küm War atema asenoki la bilemteter,” ta ashi.
Indira Gandhi ya India nung tetsür Ato kilonser rongnung mezüngbuba inyaka liasü. Tang tashi nung India tsür Ato kilonser inyakdangerbo la dang lir. 1966 küm January ita nungi 1977 küm March tashi la Ato kilonser inyakba sülen maneni 1980 küm January ita nungi la asüba mapang, October 1984 tashi la Ato kilonser inyak.
1984 küm October 31 nü Akbar Road nung lar kima la indang bodyguards anati la khaseta liasü.