PM Modi ya o saloka jembir ka: Rahul

Chambaran (Bihar), September 19 (Agencies): October 12 nü nungi tenzüka Bihar nung assembly election agitsü mapang ana nung lia Honibar nü Congress tatong Tir, Rahul Gandhi-i maneni NDA sorkarji suit asemba sorkar lir aser Ato kilonser Narendra Modi ya ‘feku’ ka (o saloka jembir) lir, ta aitsüogo.
Tanü Bihar, Ramnagar district nung election nüboyim sentong nung jembidang Rahul Gandhi-i, Ato kilonser Narendra Modi-i tang tashi pai Lok Sabha election mapang nangzükbatem meinyak, ta aitsü.
“Ato kilonser Modi-i mapa lakh ana, nisung shia account nung sen lakh 15 aser jenjang ajemtsü nangzükogo. Itemji ataloker asü (?)” ta Rahul Gandhi-i ashi. “Modi ya ‘feku’ ka liasü aser maneni ibaji lir,” ta paisa ashi.
Congress tatong tir onük nung tongtibangsüa Ato kilonser süoshi nung rangloker jembi.
“Modi ya süngo ayoker ka ama tenzük. Iba mapang nungji pai ‘kurta’ süoshi asem. Tangbo pa süoshi tajungba akumer. Kurta sema aliba nungi tangbo pai sen lakh 15 jenjang suit asemer,” ta Rahul-i ashi.
“Tangbo Ato kilonser Modi-i suit asemertem den-ang jembir,” ta paisa ashi.
August 30, 2015 nü Patna nung secular teloktep indang ‘Swabhiman rally’ alidang Congress Tir Sonia Gandhi, RJD tongti lenir Lalu Prasad aser JD(U) lenir aser Bihar chief minister Nitish Kumar nungeri jembia liasü, iba sülenbo tanü Rahul nüboyim sentong ya tulutiba liasü.
Tanü nüboyim sentong nung Nitish Kumar aser Lalu Prasad nabo maden, kechiyong party canadidate shimba maparen nung tena kanga mazüngi liasü.
Tanep Rahul Gandhi nüboyim sentong nung adentsü atema nisung kati air gun ka bener aruba yong puogo, ta police-i ashi.
“Bangsemo keta alir nisung ka den air gun ka puogo. Pa meyong air gun den pa yangkhu pua lir,” ta district police ketdangser kati ashi.
Taruba Bihar election nung Congress, JD(U) aser RJD senteper secular teloktep ka ama tokteptsü.
Bihar nung Assembly menden 243 atema October 12 aser November 5 na tsüngda telemsa pongu nung election agitsü aser November 8 nü vote azüngtsü.