PM Narendra Modi-i anogo ananü UAE semdanger

Deobarnü Abu Dhabi nug India Ato Kilonser, Narendra Modi-i Sheikh Zayed Grand Mosque semdangba mapang UAE Minister of Higher Education & Scientific Research, Sheikh Hamdan bin Mubarak Al Nahyan (abelen) den külemi ‘selfie’ ka agiba angur. (Abu Dhabi, August 16, 2015)

Abu Dhabi, August 16 (Agencies): India Ato kilonser Narendra Modi-i UAE anogo ananü semdanga tanü Abu Dhabi tonga aruogo, pai UAE linük tongti ketdangsertem den shishilembaba tesentaktep tajungba akümtsü aser security ken o lemteptsü aser tatemsa India sensotem den jembitsü.
Küm 34 sülen tang mezüng India Ato kilonser kati Gulf linük ya semdanger. Pa Abu Dhabi tonga aruba mapang tayimtsü anendak Abu Dhabi nung Crown Prince, Sheikh Mohamed bin Zayed Al Nahyan-i agizüka liasü. Crown Prince den par adianu pongu densema liasü.
Shitakba inyakyim agibo Crown Prince kati tayimtsü anendak ketdangsertem agizüktsü memelar. Crown Prince ya UAE Armed Forces nunga Deputy Supreme Commander lir aser pai tesüsa tongti ketdangser ka tayimtsü anendak agizükbaji, 2015 May ita Morocco Chuba agizüka liasü.
Tayimtsü anendak sobaliba yimya nung Modi agizükba sülen Emirates Palace nung pa meyong hotel-i oa anenzük. Iba sülen pai alima nung Mosque tulutiba jenjang asembuba nung aliba Sheikh Zayed Grand mosque semdang aser tesülen India nunger ajurua liasü.
Hombar nü pa Crown Prince den senden amenba sülen Dubai yimtii aotsü aser ghonda ishika tsüngda Tatong Tir aser Ato kilonser Sheikh Mohammed bin Rashid Al Maktoum den senden ka amentsü, alima nung Burj Khalifa talangtiba semdangtsü aser Dubai Cricket Ground nung India sensotem den jembitsü.