PM Narendra Modi-i Gold Schemes tenzüktsüogo

New Delhi, November 05, 2015: Brihostibar nü New Delhi nung Ato kilonser, Narendra Modi-i India nung tang mezüng gold coin sayatsüba aser Gold monetisation scheme densema hon dak sentakba scheme ana lapoktsüba noksa nung angur. Noksa nungsa Finance, Corporate Affairs and Information & Broadcasting Union Minister, Arun Jaitley, Minister of State for Finance, Jayant Sinha aser Minister of State for Commerce & Industry (Independent Charge), Nirmala Sitharaman nungera angur. 

New Delhi, November 05 (Agencies): Tanü Ato kilonser, Narendra Modi-i kibongtem nung aliba sen lakh crore 52 jenjang hon banking system kübok aittsü indang scheme ka lapoktsüogo.
Kümshia India-i hon ton 1,000 bendanglen nungi alir, koba ajanga foreign exchange jenjang tamajungba akumer aser sentsüh adoktsüsa akumer. Tang India nung sen lakh crore 52 jenjang hon ton 20,000 rizünga lir.
Modi-isa tang mezüngsüa Indian gold coin aser bullion sayaogo, iba nungji tip külen national emblem Ashok Chakra aser tip külen Mahatma Gandhi noksa lir.
“Item scheme maongka ya nüburtemi agiba ajanga linük yangerba nung yaritsüla,” ta Modi-i ashi.
Gold Monetisation Scheme (GMS), 2015 kübok bank temi küm 15 tashi hon bendena ayoktsü mesüra mapang-mapang shia ‘jewellers’ nem agütsütsü. Hon deposit asürtemia küm shia interest shilem 2.50 tashi angutsü.
Hon aliba ajema akumtsü nükjidong nung Sovereign Gold Bonds Scheme tenzüktsüogo, iba scheme ajanga küm shia interest shilem 2.75 agütsütsü.
Talirtemi pei indang Permanent Account Number (PAN) aser Know Your Customer (KYC) kakettem indang osang agütsütsüsa akumtsü.
Tamasabo coins ji gram 5 aser 10 denomination nung dang angutsü. Gram 20 bullion-a MMTC outlet 125 nungi angutsü.
“Linük nung hon ton 20,000 tashi kidang, tekülem ki aser rejutem nung oda yur sensaka alitsüji tesasatsüka, mapatong shitak benokba ajanga India-i ‘sensaker linük’ nüngja nungi adoktettsü, ta Modi-isa ashi.
Hon timtiba aliba linük, China India-i ajangtetogo, aser taküm küm tang tashi nung hon ton 562 aliogo, ta paisa shisem.