PM Narendra Modi-i India linük maksütsür: Congress Party

New Delhi, November 13 (Agencies): Hokolbar nü Congress-i, bendang linüktem semdangba mapang Ato kilonser Narendra Modi-i pai linük tenüng asentenshia ajungkettsü ta jembir, ta aitsü.

Ato kilonser Narendra Modi Britian nung aliba mapang tanü New Delhi nung osangbenertem senden ka nung jembidang Congress lenir Anand Sharma-i, “India tenüngji pai tanaben asentenshia ajungkettsü ta pai jembibaji onoki khenyongi magizüker,” ta ashi.

Congress lenirisa ashiba agi, Modi-i jembiba o ajangaji, tamalenbo India tenüng junga maliasü aser 2014 küm Modi tashii marüi aliba mapang tashi nungbo alimai India akhüm metsübui liasü ta shiner.

“Pai semdangba (linüktem) yimti shia nung pai iba o ya maneni jembiba ajanga pai linük maksütsür,” ta Anand-i ashi.

“Tamalen-a India akhümtsübua liasü, India tenüng tajung liasü aser sorkar mapatongtem ajanga FDI atema tesem tajung liasü,” ta paisa ashi.

Congress leniri, tanübo India nung tetsübu tensa ka lir, aser iba tai ajungaji Ato kilonser dak keta lir, ta ashi.

“Sorkar maparenji Ato kilonseri ketdangser. Linük maparen ketdangsüba nung Ato kilonser dak tashi lir. India noksa raksatsüba ya Modi-i kümzüka ayuba aser pusemba forces tem ajanga lir,” ta Sharma-i aitsü.

India ya tamangba yimsü ajak sadoka amangtetba aser benshitetba linük, ta tenüng tajung aliba tesüleni atsüngzüka luogo, ta paisa ashi.

Tanü linük nung tamangba lokti tsüngda akhümtsübutep maliba aser yimjung maliba ya Modi’er sorkar, BJP aser parnok den densemba teloktem tai ajanga lir, ta Congress-i tai tongloktsüogo.