PM Narendra Modi-i ‘Mann ki Baat’ mapang gari lendong indang jembi

New Delhi July 26 (Agencies): Gari lendong balala nung nisung jenti asüba asoshi tebilemtsü ka tanü Ato kilonser Narendra Modi-i, kibong ajaki lanurtem dang gari lenmang ozüngtem metetdaktsütsübaji pei teinyaktsü ka lir, ta ashi.
“Linük nung minute pezü shia nisung ka gari lendong nung asür ta statistics nung angubaji taoksatsü osang ka lir. Sorkar dak alia kibong nung lanurtem dang gari lenmang ozüngtem indang metetdaktsütsübaji kibong ajak teinyaktsü mapa ka lir,” ta ita shia aliba ‘Mann ki Baat’ sentong nung Modi-i ashi.
“Gari lenmang lendong nung asürtem shilem asem nungi shilem kabo arishi küm 15 nungi 25 tsüngdapurtem lir. Iba ya temulung nung yur onoki road transport & safety bill benokner,” ta paisa ashi. Road safety policy dak sentakba nung Modi-i, “Kobi melii sorkari road safety policy ka sayatsü aser teshimtet yimti kar aser nation highways nung lendong ajururtem nem angati teyari agütsütsü,” ta metetdaktsü.
Iba radio sentong nungsa Ato kilonseri Kargil rara mapang taküm tenla agüja asürtem nema akhüm agütsüogo.
“Kargil Vijay Diwas anogo nung, Kargil rara nung asür tasütait sepaitemi taküm tenlaba atema ni parnok ajak nem salem agütsür,” ta Modi-i ashi.
Pai lokti tebilemtsü onük balala indang jembi, saka yimtemren indangbo mejembi.
Opposition party temi External Affairs Minister Sushma Swaraj, Rajasthan Chief Minister Vasundhara Raje aser MP Chief Minister Shivraj Singh Chouhan nunger menden nungi aludakjang ta akhangba ajanga tang Parliament senden junga magiteti lir.