PM sülen bendang limai aoertem tenüng meshi

New Delhi, Rongjui/September 4 (Agencies): Central Information Commission-i, external affairs ministry dang Ato Kilonser Narendra Modi-i bendanglima semdangba mapang pa meina aoertem indang tenü metetdaktsütsü asoshi tetuyuba agütsüogo.
Taoba küm Mongputeni/Oct nung Karabi Das-i ministry dang 2015-16 aser 2016-17 tsüngda Ato Kilonseri bendanglima semdangba mapang sen indokba aser pa meina senzürtem tenüng metetdaktsütsü asoshi asüngdanga liasü.
Iba sülen ministry-i osang tejangja magütsüba ajanga pai commission dangi ken o bena liasü.
Ministry-i iba osang agütsüba atema sen 224 meshi koba applicant tenüng nung nokdangsang activist Subhash Agrawali-i ken o angadangba mapang agütsü, ta Chief Information Commissioner R K Mathur-i ashi.
Ken o angadangba mapang ministry-i, Ato Kilonser-i semdangba linük, mapang aser anogo aser chartered flights nung indokba sen dak alaka tanga data kecha bendena mali, ta ashi.
Ministry ajangasa commission dang, sen 224 agütsüba dak sendakba nung ken o asadangba sülen osang agütsütsü, ta ashi.
“India sorkari sen indoka Ato Kilonser sülen bendang limai aoertem (security dak sendaka malirtem) tenüng tem appellant nem agütsütsüla,” ta Mathur-i tetuyuba agütsü.