PM tenüng menüktsütsü atema kaketzülurtemi award meyiptsür: Anupam Kher

Mumbai, October 14 (Agencies): Linük nung tamangba yimsü dak sentakba nung mepetmesü adokba aser kaketzülurtem ola nokdangba anema kaketzülurtemi pei award meyipa agütsüba atema Bollywood actor Anupam Kher-i kaketzülurtem aitsüogo.
“Iba ya yimtenren ajanga ajungmesoba lir, linük nung raraba tatalokbatem ya tang mezüng ataloker masü,” ta Kher-i ashi.
Paisa, kaketzülurtemi pei award meyipa agütsüba ya Ato kilonser Narendra Modi tenüng menüktsütsü atema lir, ta ashi.
“Ni bilemer, iba ya timbaka PM tenüng menüktsütsü atema lir. Parnoki meyiptsünüra kechiba ajak memeyiptsür (?)” ta pai ashi.
“Kü kinüngtsü BJP nung dena aliba ajanga kaketzülurtemi award meyiptsüba indang ni aitsür ta aikati jembir, kü tangatetba lemsabaji nija tebilemba lir,” ta paisa ashi.
Pakistan nunger kentener Ghulam Ali anemba dak sentakba nung Kher-i, “Kü jilushi Pakistan nung sayatsü atema memela, ni aiben mepishiogo, saka kü nem visa magütsü..Ibaji kecha masü,” ta ashi.