PMLA ken o nung Mallya-i mapang meshir

New Delhi, March 17 (Agencies): Tanü shishilembar tetsüdi, Vijay Mallya-i pa Enforcement Directorate (ED) matsüngdangi aotsü atema April ita tashi mapang meshiogo; iba tetezü IDBI bank dang sen apuba ken o nung ED-i jaokba anogo nung pai ED matsüngdangi aotsü makoktsü.

Ketdangsertemi ashiba agi, Mallya-i Enforcement Directorate nung investigating officer dang pai asüng (March 18 nü) ED matsüngdangi marutettsü ta metetdakja April ita tashi mapang meshiogo.

Parnokisa ashiba agi, Mallya den tongtepratepdang pai metetdaktsüba kuliji ketdangsertemi shisadangdar aser pai mepishibaji agizüktsü asü magizüktsü’ar tekaraba nung lemtettsü.

Tamalen ED-i Prevention of Money Laundering Act (PMLA) nung lateta alibatem nung ajemdaker March 18 nü Mallya jaoka lir.

Yaküm CBI FIR-i Mallya anema ken o benokba nung ajemdaker tawa ED-i Mallya aser tangartem anema ken o benoka lir.

CBI-i Kingfisher Airlines Chairman, Mallya, Director tem, taoba mapang Airlines Chief Financial Officer, A Raghunathan aser IDBI Bank ketdangsertem anema FIR benoka lir. Sen aputsütsü lateta aliba ozüngtem alema Mallya nem sen aputsü ta parnok nem tai tonglokja lir.