PMO-i Haryana CM, Manohar Lal Khattar dak tenük yokdar

New Delhi, August 30 (Agencies): Taoba hopta Haryana nung Chief Minister, Manohar Lal-i aniba sorkari state nung rara mazüoktetba atema aikati pa aitsüba mapang ka nung tanü ketdangser kati, Prime Minister’s Office-i Khatar dak tenük yokdar, ta metetdaktsü.
Manohar Lal maneni Chief Minister inyakra yimsüsübaren tashi maittsü ta bilema Centre-i pa dak tenük yokdar, ta kasa osang ajanga ashi.
Taoba hopta CBI court-i Dera tongti, Gurmeet Ram Rahim Singh-i tashiyim amshia tetsür ana raksatsüba ken o nung pa aitsüba sülen pa sülen anidakertemi state nung longkak aita raradang nisung aika asü, aser iba dak sendakba nung PMO-i asüngdangyaba mapang nung Manohar Lal-i telangzüba junga magütsütet.
Tanü PMO nung tongti ketdangser kati, “Taoba hopta tatalokbaji police aser ketdangsüba tashimaitba ajanga lir, anungi Centre-i ibaji züba-züba magitsü. Tashimaitji kechiar onoki maneni bushidar, ajisüaka state sorkari parnok inyakyim melenshitsü nüngdaker,” ta metetdaktsü.
“Agency balala nungi Intelligence osang ajangabo state police tashimaitba indang kuli agütsü, ajisüaka parnoki parnok teinyaktsü junga meinyak ama reprangteter,” ta ketdangserisa ashi.
Ketdangseri, Manohar Lal’er sorkari asemben tashi tensa mazüoktet. Tatalokba anaji 2014 küm tsüngrem nisung Rampal (iba mapang nung nisung trok asü) aser 2015 küm Jat nunger longkak aitdang nisung 30 asüba tatalokbatem lir.
State ketdangsertem dang rara adoka tensa raksatsüa akok, ta Intelligence osang ajanga metetdaktsür liasü. Ajisüaka Section 144 junga mebenok.
Haryana Chief Minister-i Centre nung ketdangsertem dang, Section 144 junga mebenokbaji police tai ajanga lir, ta tai tonglokja liasü.
Centre-i tang Haryana ketdangsertemi ashiba oji asadangdar.
Iba mapang nung sepaitem lenmang nung duty melemzüktsü aser Dera tongti, Ram Rahim sülen anidakertem adenshibaji-a menokdangi liasü.
Ketdangserisa, “Nisung dak akhatsü atema police ketdangsertem nem tetuyuba agütsü asü magütsü? Parnoki kechiba iba tensa mazüoktet? Parnoki parnok teinyaktsü meinyak asü? Item ajungaji onoki reprangshitsü,” ta ashi.
Jat nunger longkak aitba mapang nunga tensa mazüoktetba atema Centre-i Manohar Lal arrja liasü.