Pogba-i Manchester United asayar akümtsü tezüngzüktep agir

London, July 30 (Agencies): France nunger football asayar mongin, Paul Pogba-i England nung tentetba tongti football telok, Manchester United asayar tanaben akümtsü tezüngzüktep agiogo.
Jose Mourinho-i aniba United teloki otsüsütsüsa Pound sen million 100 tashi Italy champions, Juventus telok nem agütsütsü tezüngzüktep agiba sülen Pogba United asayar akümtsü nangzüktepba osang angazükogo.
Tan tezüngzüktep agiba sülen Pogba-i hopta nung Pound sen 290,000 aazüka taruba küm 5 tashi United telok tenüng nung asayatsü renemogo.
Tan Pogba nübo alizüktsü tezüngzüktep agiba ya Real Madrid striker, Gareth Bale nübo alizüktsü asoshi Pound sen million 86 agütsütepba otsü ajangteta otsü tasen yanglur lir.
Arishi küm 23 tain Pogba nübo alizüktsü asoshi United teloki Euro sen million 120 tashi agütsütsü renema aliba osanga angazükogo.
Pogba-i küm 4 tejaklen United telok toktsüba sülen Juventus telok nung züngsem aser par telok tenüng nung 2019 küm June ita tashi asayatsü tezüngzüktep agia liasü.

You must be logged in to post a comment Login