Pogba-i Manchester United nung züngsema otsü tasen yanglur

London, August 09 (Agencies): France nunger football asayar mongin, Paul Pogba-i Manchester United telok tenüng nung tanaben asayatsü asoshi euro sen million 105 jenjang aketba tezüngzüktep agia otsü tasen tanü, Mongolbar nü yangluogo.
“Pogba-i Juventus telok toktsür ozü telok tenüng nung taruba küm 5 tashi asayatsü tezüngzüktep agiogo,” ta United teloki sangoktsü.
Tan Pogba-i United telok nung tanaben züngsemtsü asoshi euro sen million 105 agizükba sülen Real Madrid teloki Gareth Bale nübo alizüktsü asoshi Tottenham Hotspur telok nem euro sen million 100.8 agüja 2013 küm yangluba asayar nübo alizüktsü asoshi sen timtiba agütsüba otsü ajangteta otsü tasen yanglur lir.
“United telok ya ni ayuba mangdang ajunga asangsang nung ajangzüktetba telok lir. Ni tanaben United telok nung züngsemtsü maongka anguba atema kanga pelar aser manager Jose Mourinho lenisüba kübok takok ngua asayatsü yongyar,” ta arishi küm 23 tain Pogba-ia metetdaktsü.
Pogba-i United telok tenüng nung asayatsü asoshi agiba tezüngzüktep 2012  küm tembangba sülen pai Italy-i oa idakji tentetba Juventus telok nung züngsema asaya.
“Pogba ya alima ajunga nung football asayar tajungtiba rong nung densemer asayar lir aser pai tongti shilem agia, ozü United teloki taoba mapang ama, tematiba jenjang atongtsü tamang akar,” ta Alex Ferguson melena United manager akümsang, Mourinho-ia metetdaktsü.
Taoba mapang Serie A takok marok 4 ben tashi atonga agizüktsüsa aser par France teloki Euro 2016 final asaya akoktsüsa tongti shilem agisang, Pogba-i taoba mapang United telok nung züngsemdang par telok tenüng nung asaya 7 tashi nung dang shilem agia liasü saka tanübo pa alima ajunga nung asayar mongin ka ama United telok nung tanaben züngsemer lir.