Pogba sen million pound 100 malang:Souness

London, August 7 (Agencies) : Manchester United-i star midfielder Paul Pogba nübu aginüdang sen tali lalutsü amai Liverpool nungi tesüiba mapang nüngtugu football asayar Graeme Souness-i bilemer. France nungi international asayar Pogba ji par telok Juventus-i ataktettsüba sen malang, ta Souness-i ashi.
1980s tetenzüklen Liverpool nungi central midfielder aser Sampdoria telok nungi küm ana tashi Serie A nung asayadanga alisang, arishi küm 63 tain, Souness-i Juventus star, Pogba world class asayar rongi aitsü ano mapang temsüa maküm amai bilemer.
“Sen million pound 100 alangba asayarji tangar dang nungi khen yongi balaka asayateter ka asütsüla. Paul Pogba ano iba jenjangji matong. Pa dak midfield nung junga asayatsü sempetbo lir, ajisüaka pa atema iba ama senkhu tasak ataktettsütsü ano mapang tera matong,” ta Souness-i ashiba Deobarnü The Times osang ajanga metetdaktsü.
“Ni paji all-round midfield asayar tajung ka ta meteta lir aser kechiba Manchester United-i pa alitsü mulungtet ibaji angateta lir, ajisüaka senji onsara,” ta pai ashi.
“Pai Euro 2016 nung kangasa junga asayatetogo. Pa asayar tajung ka lir ajisüaka pai Luis Suarez ama mongpu ka nung goal 40 yoker ka masü,” ta paisa ashi.
“Pa Juventus atema European Cup semi-final aser final asaya nung Real Madrid o Barcelona na den asayadang pai kecha balakabo masayatet, ta tesüiba mapang Tottenham Hotspur F.C. nung star, Souness-isa ashi.