PoK ji Pak nungsa alitsü: Farooq

Srinagar, November 27 (Agencies): Taoba mapang Union Minister, Farooq Abdullah-i, Pakistan Occupied Kashmir (PoK) ji Pakistan nungsa alitsü, ta jembiba ajanga ashishitep onük ka adokogo.
Tanü Jammu nung Abdullah-i, “PoK (Pakistan Occupied Kashmir) ya Pakistan nung lir aser yangjisa alitsü, Jammu & Kashmir ya India nung lir aser yangjisa alitsü. Iba ya asenoki angatettsüla,” ta ashi.
Pai jembiba oji jangjatsütsü asüngdangba mapang Abdullah-i, “Ni joko küm aika ibaji (PoK) India shilem ta jembia aruogo. Ajisüaka nenoki kechi inyak (?) Nenokia ibaji India shilem ka ta züngshi asü (?)” ta ashi.
Taoba mapang J&K chief minister Abdullah-isa, “Raraji lenmang ka masü, taküm dang samar. Ken o jembiba ajanga dang latettsü,” ta ashi.
Abdullah-i jembiba o aija BJP lenir aser J&K Deputy CM, Nirmal Singh-i, “1994 Parliament bangzüng ka ajanga PoK ya India shilem ta jangjajangja shia lir,” ta ashi.
BJP lenir aser taoba Home Secretary RK Singh-ia, “Iba sangdong ya tiyazü. Iba ya Pak-i atsünga agiba Kashmir, aser ibaji temzüng alema Pakistan-i atsünga agiba lir,” ta ashi.
1947 küm nüjiso anguba aser Pakistan-India lemdangba sülen India aser Pakistan na rara asemben raraogo, rara anabo Kashmir atema raraba liasü.