Poland-i anir NATO mitkar terenemshitsü sentong agir

Warsaw, June 07 (Agencies): Poland mitkartemi anir külen North Atlantic Treaty Organization (NATO) nung züngsemba linük 20 dak tema nungi mitkartemi terenemshitsü sentong agi tenzükogo.
Russia-i Ukraine nung tashiyim inyakba ajanga Europe tiyongtsü aser anüdoklen tentetba linüktemi benokba tebilemtsü khuret pungbadaktsütsü nükjidong nung NATO-i par mitkar terenemshitsü sentongji tan agir lir.
“NATO mitkartemi par terenemshitsü sentong agiba ajanga Europe nung tensa tamajungba kümdaktsütsü,” ta shia, Kremlin-ia NATO-i tan mitkar terenemshitsü sentong agiba mapatongji aitsüogo.
Russia-i tashiyim agi Ukraine ket nungi Crimea peninsula agiba sülen Russia aser West na tsüngda Cold War mapang dang nungi tang tensa kanga agi tamajungba kümogo.
Tesüiba mapang Soviet Union nung züngsemba linüktem indang inyakyim nung teka mamoktsü asoshi Russia-i tuyua lir saka tesüiba mapang aser tanü putu khen yongji balaka küma  melenshiba olen ka NATO Secretary General, Jens Stoltenberg-i metetdaktsüogo.
Aji oda, Poland-i anir anogo 10 tashi agitsü ayongba Anaconda-16  mitkar terenemshitsü sentong nung mitkar züngsem 31,000, mitkar gari 3,000, mitkar tayimtsü 105 aser tzüyim sepai rong 12 tashi shilem agiba osang jangjaogo.
“NATO nung züngsemba linüktem lendong balala nungi kümzüktsü asoshi agiba mitkar terenemshitsü sentong ka Anaconda mitkar sentongji lir,” ta Poland defense minister, Antoni Macierewicz-ia osang jangjashitsüogo.
Tan agiba mitkar terenemshitsü sentong nung shilem agir teloktep NATO mitkartemi aonung helicopter tayimtsü amshia arrür mita amaktsü, apu yanglutsü aser anüngtem kümzüktsü terenemshiba agiba den külemi, lendong tsüdong atalokdang nüburtem kümzüktsü terenemshiba agitsü tenzüka lir.