Poland-i asür Boris Nemtsov jala nem Solidarity sempet agütsüogo

Russia opposition lenisang, asür Boris Nemtsov’er jala, Zhanna Nemtsova (Abelen)-i Solidarity sempet agizükba sülen Poland Tir, Bronislaw Komorowski (Tiyongtsü) aser taoba Tir, Lech Walesa (Achijilen) na den külemi nokdaka aliba noksa nung angur. (Warsaw, August 05)

 Warsaw, August 05 (Agencies): Poland-i Russia opposition lenisang, asür Boris Nemtsov’er jala nem temaba meimchir temeten sempet yashi Mongolbar nü agütsüogo.

Boris kasetba jakdang pai par Russia nung democracy yimsüsütsü yimya benshitsü asoshi par senso ajunga ajungmesoba nüngtem nung par jala, Zhanna Nemtsova nem sempet den külemi, dollar sen million 1.1 amokja liasü.

Poland Tir, Bronislaw Komorowski aser Poland nung meimchir temeten asoshi nokdaker mongin, Lech Walesa nati anir Warsaw yimti nung agiba sentong nung Zhanna-i tebo tenüng nung Solidarity sempet aser senpet senji agizük.

Zhanna-i sempetji agizükba sülen, tebo nem aküm agüja minute ka ola madoki atatsü mepishia liasü.

Mejangjatetba nisung kari Russia Tir, Vladimir Putin anemsang, Nemtsov taküm February ita Kremlin kimalen kaseta liasü.

“Tan sempet agizükba ajanga tanüngba Russia sensotemi pei temeten asoshi tasü ita nokdaktsü ajungmesotsü imlar,” ta tebo kasetba sülen Russia toktsüla, arishi küm 31 tain Zhanna-i metetdaktsü.

Moscow nung television osangbentsü mapang inyakla, Zhanna-i tang Germany kübok Berlin nung tentetba Deutsche Welle television telok asoshi osangbentsü mapa inyaktsü tenzüka lir.

Tesüiba mapang Soviet Union kübok densemba Poland-i 2014 küm nungi tenzüka iba Solidarity Award agütsüba osang jangjaogo.

Nemsov taküm February ita 27 nü kasetba sülen, “Russia sorkari tuyuba anga Nemtsov-ji Russia sorkari ketdang asüba security services mesüra sorkar pusemba tentet kari kaset,” ta nübur temeten asoshi nokdakba Russia nunger Alexei Navalany-i temulung malemba olen metetdaktsü.

Ajisüaka, Nemtsov kasetba maparen nung Russia sorkar densema mali ta Kremlin-i metetdakja Alexei-i sangoktsüba osangji magizük.

“Nemtsov kaseter ajunga nem tapet temerenshi agütsütsü,” ta Putin-ia nangzük saka tanü tashi nung temulung melemteti apuba nisung 5 den sentakba ken o okadak angadanga mali.