Poland-i Jets yoktsü lemtetra UK-i yaritsü

London, Metsüremi/March 8 (Agencies): British defence minister Ben Wallace-i Mongolbarnü ashiba agi, Poland-i Ukraine nem fighter jets agütsütsü atema telemtetba agira Britain-ia parnok nongita yaritsü, ajisüaka iba jenjang agiba ajanga Poland dak indang indanga kongshitsü akok ta tekümdangtsü metetdaktsüogo.

“Parnoki kechi telemtetba agidir agiaka ni parnok nongita yaritsü,” ta Wallace-i Sky News dang ashiba den Ukraine nungeri amshitettsüsa United Kingdom-i tayimtsü magütsütettsü.

“Onoki Poland kümzüka ayutsü; parnoki kechi nüngdakdir iba atema onoki teyari agütsütsü,” ta pai ashi.

“Poland-i iba telemtetba agiba ajanga Ukraine nem indang indanga teyari agütsüba dang masü saka iba ajanga parnoka Russia mesüra Belarus amala linüktemi amak tenzüktsü akok ta Poland-i angateter alitsü,” ta Wallace-i ashi.

Britain-i Ukraine nem defensive weapon tem aser iba den tanga military aser humanitarian teyari agütsüogo.

Wallace-i ashiba agi, pai Bodhbarnü parliament nung osang ka agütsütsü. Britain-i maneni kechi koda lethal aser nonlethal teyaritem agütsütettsü iba indang asadangtsü aser koba lenla nung linüktem dang jenjang agitsü atema British sorkari mepeshitsü, iba indagji sensak asemtsü.

Kasa mapang nung Canada-ia Russia nunger lenir den sensdaktepa aliba lenir 10 nem tenokdangba tasen agütsüba sangdongogo, ta Canada Ato kilonser Justin Trudeau-i Hombarnü metetdaktsü.

Item lenirtem indang tenüng ya Russia nunger tepuokdak yua aliba opposition lenir Alexei Navalny-i bendenba list nungi lir, ta Trudeau-i London nung osangbenertem den sensaksemba mapang ashi.