Poland nunger ozüng yangluretemi ‘Holocaust law’ nungiter

Warsaw, Poland, Feb 01 (Agencies) : Alima rara tanabuba nung German nunger lenir Adolf Hitler-i aniba Nazi teloki Yihuda nunger million aika tepsetba koba dang ‘Holocaust’ ta ajar, iba dak sendakba nung Poland nunger atishia jembiba azüoktsü asoshi renema aliba draft ka tanü Brehostibarnü Poland nunger ozüng yanglurtemi agizükogo. Iba ozüng “Holocaust law’ ajanga Poland nunger ya Israel aser United States naprong den tesendaktep nung mangatettep adoka lir.
Poland nung ruling conservative Law & Justice party ajanga benokba bill ya tatem küma agizükra aibelenertemji küm asem tashi tepuokdak ayutsü.
Germany nunger Nazi teloki inyakba tashiyim maparenji Poland nungertem nem metetsümonga tongloktsüra parnok nem temerenshi agütsütsü. Iba ozüng yanglutsü tenzükba meteta Israel den tesendaktep mejungi aküm aser United States-ia junga bilemdanger reprangshimtsü atema shiogo.
Tanep tatartem rongnung vote agütsütepba nung iba bill junger ta agizükertemji 57-23 liasü saka tata anabo idakji maden.
Ibaji ozüng akümtsü atema Tir, Andrzej Duda nungi temelaba meyongnem agitsüla. Poland sorkari ashiba agi, World War II mapang Nazi Germany nungertem Poland nung aruagi inyakba indang “Poland nunger death camp” tasa aitshia jembiba anema parnoki nokdaker.
Nazi Germany nungertemi Yihuda nungertem anema tashiyim maparen tamajungtiba inyakba rongnung Poland lima nung inyakbajia ka liasü aser aji oda, parnoki ‘Holocaust memorials’ wazüka yua lir.
Iba dak sendakba nung Deputy Justice Minister Patryk Jaki-i Israel den asüngdangtepa parnokia mulung masüba kecha memetetdaktsü ta shiogo saka Israel nunger aikati ashiba agibo World War II mapang Yihuda nungertem tepsetba maparen nung Poland nunger kari inyakba nung parnoki teka metsükdoktsü meranger.
“Atangji idakji Yihuda nungertem dak kechi atalok, iba denji khenyongi meputep,” ta tang tasen yanglutsü renema aliba ozüng tasenba indang jembidang ‘Holocaust’ reshikangshi nungi taküm kümzüka alila aser tang Israel nunger kaketzülur tenüng agi Halina Birenbaum-i jashia metetdaktsü.