Police Day nü Nagaland-i asür police 434 nem tetushi agütsügo

Kohima, October 21 (TYO): Linük den tsüngkang medema tanü Nagaland nunga Police Lawn Tennis Court, New Reserve, Phesema nung Police Day anogomung amungdang yaküm September 1, 2014 nü nungi taküm August 31 nü tashi nung linük nüburtem kümzüka alitsü atema defence mapa nung taküm tenla agüja asür police 434 nem akhüm tetushi agütsüogo.
Police Commemoration Day sentong nung tongti tesemdanger Nagaland Home Minister, Y Patton aser Director General of Police, L L Doungel nati anir state-i linük nüburtem kümzüka alitsü mechi, iba mapang nung uniform nung taküm tenla agüja asürtem nem naro tokja akhüm agütsüogo.
State yimtiba, Kohima nungi kilometer ishika pilar aliba Police New Reserve, Phesama nung Police Commemoration Day Parade alidang DGP-i Nagaland nungia constable ana- Moakumzuk Ao aser Kebioba Yimchungru na densema tasütait asür police 434 indang ‘role of honour’ zünga metetdaktsü.
Police tongti-isa police dang nüburtem tenzükba mapa nung ano tali bendanga inyaktsü ayongzük.
DGP-isa Commemoration Day Parade puti otsü tetshia 1959 küm October 21 nü Hot springs, Ladakh nung China sepaitemi SI Karam Singh lenisüba nung CRPF sepai 21 mendanger amakba aser iba lendong nung sepai 10 asüba den aika yiruba aser aika apuba sülen tekümna (1960) chiok, ta ashi.
State police aser SIB nungi Senior ketdangsertemi-a asürtem nüngshilung nung naro tokja liasü.
Iba anogomung nungsa tasütait sepaitem nem akhüm agüja Commemoration Parade kaogo.
1959 küm October 21 nü linük arrtsü anükba mapang taküm tenla agüja asürtem bilemteta kümshia iba anogo nung taküm tenla agüja asürtem bilemteta amunger.