Police deptt nung ochimashi mapatem ya CBI nem bushidaktsütsü akhanger

Dimapur, June 15 (TYO): Nagaland Home department kübok police Headquaters nung Kerala nunger tsümar ka tenüng agi, MKR Pillai nem tongtibang maparen ajak inyakdaktsür, kechiyong Naga nunger tulurtemi Delhi nung oagi kecha meinyakteter ta Nagaland DGP Doungel-i ashibaji Naga nunger mezüngmeshiba mapa ka asütsü ta Business Association of Nagas (BSN) teloki metetdaktsüogo.
Ano, Nagaland Police lenirtemi Pillai melira Nagaland Police maparen ajak anenadoktsü ta bilemra, item Naga nunger police officer-temji anenadoktsüla aser mapa akoker lanurtem nem maongka agütsütsüla ta BAN-isa metetdaktsü.
Pillai ya tamasabo Nagaland police nung constable nung ai aser Additional SP jenjang tashi tua inyaker mapa nungi anen aser mapa nungi anenba sülen-a pa Police Headquaters nung ‘Consultant’ shim. Iba ama tashiji amshia pai pa mapa den mesütep par lima Kerala nung rongsen bendenba Income Tax purtemi puteta bushisüngdangdagi. Angazükba, agi Nagaland nung Pillai meyong bank balala nung account 20 shi liasü aser yangji sen crore ka shi yua liasü saka Kerala nungbo pa meyong sen crore noklang aika apuba den ano pa meyong kiojen aser ali rongsen sen crore meyirijang dak tali jenjang IT teloki puteta lir.
Ano, taoksatsüka kaji oagi Kerala nung par kidang Nagaland police truck ka anena yua lia putetbaji asütsü. Iba atemaji Nagaland Police Headquaters nung alir ketdangsertemi tang tashi kecha meshitetbaji tesasatsüka lir, ta BAN telokisa ashi.
Ano, Nagaland Vigilance Commission-ia pa Nagaland police HQ nung Consultant shimba kisüng atema bushisündangtsü tenzükbaji tejak meyiba mapa ka dang asütsü ta BAN telokisa mepelaba olen ka metetdaktsü.
Ano, IT department-i 2011 küm July 10 nü Kolkata Airport nung Pillai den külemi inyaker par nisung asem ket nung Dimapur nungi sen lakh 92 bener ooya lia apuba ken oji tanaben lushia bushisüngdang tenzüktsüla ta BAN telokisa takangba ka agütsüogo.
Ano, Kohima nung nisung ka tenüng agi G.K.Rengmai Kohima nung Pillai’er kidang lapoka aliba Popular bakery-ji pa meyonga ta shiogo aser Pillai den tanga business mapatema aika külemi inyaker ta metetdaktsüogo, anungji pa meyong rongsemtemjia bushisüngdangtsüla ta BAN telokisa takangba agütsüogo.
Kasa maparen nung NPRAFF telokia Nagaland rongsen ajak amuzüka auyatsüsa inyakba mapatemji CBI nem bushisüngdaktsütsüla ta metetdaktsü.
Nagaland government-i Pillai Consultant mapa nungi anendaktsübaji junger saka iba jagi Ngaland police maparen nung ochimashi pateka inyakba ya bushiteta metongshitsübo makoktsü ta parnokisa ashi.
Tamasayongi Police Headquaters nung Consultant ayutsü menüngdaker saka nüngdakra IPS aser NPS ketdangser tajung aika mapa nungi anener lir, anungji item rongnungji shimtsüla ta NPRAAF telokisa metetdaktsü.
Nagaland police department tajungba akümtsü atema center nungi yokba senotsü ochimashi amshiba kuli aika alinungji, itemji jungjunga bushisüngdanga tapet mapa inyaktsü atema ? NPRAAF teloki Home Ministry aser Income Tax department, Govt. of India dangi zülutsü lemtetogo ta metetdaktsüogo.
Ano, Pillai-i ochimashi inyakba Income Tax purtemi putetba maparen nung, Nagaland police nung lenir kari Pillai melira Nagaland Police Headquaters nung inyakba mapatem nung kanga timatemtsü aser Naga nunger police tanishirtemi shingaia peisasa pei dak temulung melemteter aser Delhi tashi nung oa kecha meinyaktetter ta metetdaktsübaji Naga nunger police officer-tem mezüngmeshiba mapa ka lir ta Nagaland Police Service Association pur sangdong ka nung metetdaktsüogo.
Center nungi senotsü bushia bener arutsübaji Police tanishirtem mapa masü saka nungloktsüra Naga nunger police tanishirtemia kanga takok ngua inyaktettsü ta parnokisa metetdaktsü.