Police force nung tetsür nem shilem 33 lemzüktsütsü : Rajnath Singh

New Delhi, March 17 (Agencies) : Police force balala nung tetsür nem shilem 33 lemzüktsütsü atema Centre-i state tem nem tetuyuba agütsüogo, ta Home Minister Rajnath Singh-i ashi.
2011 küm Delhi nung tebur telok kati tetsür ka tashiyim agi raksatsüba sülen tentetba Nirbhaya Fund kübok tetsürtem kümzüktsü aser cyber security atema police 40,500 tashi training agidar, ta Rajnath-isa ashi.
Nirbhaya Fund kübok project ana lemzüktsüogo aser taruba küm ana tsüngda counselors 60 tashi shimoktsü, ta paisa shisem.
“Police nung tetsür nem shilem 33 lemzüktsütsü atema ni Chief Minister ajak dangi shidi züluogo. State sorkartemi ibaji agizükogo aser mapa küma inyaktsü atema sentong atongdar” ta Lok Sabha nung Demand for Grants of Home Ministry o toktepba mapang Home Minister-i iba osang metetdaktsü.
O toktepdang Opposition-i sorkar aitsü. Parnoki ashiba agi, internal security aser police modernization ama tongti sentongtem nung sen ajemba ajanga kiralongra aser tali bilemba oa mapa inyakertem anema raraba tashimeiti akümtsü.
Ajisüaka, Home Minister-i ashiba agi, sorkari taruba ita ishika tsüngda ‘student-police cadet scheme’ ka tenzüktsü aser iba atema action plan renemogo.
Student Police Cadet Project ya school nung lanurtem asoshi lir aser iba sentong nung kaketshirtem dang ozüng, tashi angatsü, civic sense aser lokti nung mapa tamajungtem magizüktsü atema tesayubatem agütsütsü. Tanü lanurtem lennir tajung kaka kümdaktsütsü atema iba Project tenzüktsü, ta Rajnath Singh-isa ashi.