Police-i ACAUT züngsem 3 apu; JAC-i aitsür

Dimapur, December 12 (TYO): ACAUT aser CCN züngsemtemi Dimapur nung godown ana nungi PDS jang ozüng alema amshiba inyakyim putetba sülen anogo pezü lir Hombarnü police-i ACAUT züngsem asem puogo.
Temelaba magii godown telungi aiba onük nung ajemdaker godown kiburtemi FIR benok aser iba nungji ajemdaker Dimapur Police-i ACAUT züngsem asemji apu.
Hombarnü par asemji West Police station-i anir ao aser idak nungjagi anüngdang 11:00 ako meta Okadaki anir ao. Ajisüaka, par asemi anticipatory bail memeshitsü ta mulungtetba agi Sub Jail nung puoka lir.
ACAUT-i FIR benokba nung ajemdaker tai tonglokja alirtem aputsü melena kuli tejangja maliba nung ammeter ACAUT züngsemtem apuba atema kanga dang süngmanger aser iba ya ozüng alema inyakba mapa ka lir, ta kiyong 13 nungi tentetba Joint Action Committee (JAC)-i ashi.
Tanep ACAUT züngsemtem apuba sülen JAC-i Sub Urban police station nung godown ana kibur RZ Lotha anema FIR ka benok. Godown anaji – Kevijau colony nung M/S R.Z.Lotha aser Lhomithi yimtsüng nung Lotha Trading company lir. PDS jang open markets aser mills dang yokdoktsü atema synthetic bostatem nung tanaben asepba ken o nung parnoki FIR ji benok.
JAC-isa ozüng amertem dang tai tonglokja alirtem aputsü takhangba agütsüogo.
Parnok telongtet nung ozüng alema mapa inyakba, FCS department aser public mashileni aniba, ACAUT züngsem anema ken o tai nung FIR benokba aser colony 13 nung alirtem tsüngda meputep adokdaktsüba aser kiyong tenüng menükba anentsü atema tai tonglokja alirtem tekaratiba nung aputsüla, ta JAC-isa takhangba agütsü.
JAC-isa District administration dang ACAUT-i benokba FIR ajemdaker teinyaktsü tim inyaktsü aser tai tonglokja alirtem pur IPS aser CrPC kübok ozüng tapet agi merenshitsü atema takhangba agütsüogo.
Iba ken o ya tatembang kati maru tashi parnok telongtet nung aliba FCI godown melapokdaktsütsü aser iba telemtetba anema lapokra JAC-i junger ta bilemba inyaktsü aser iba tebilemtsü khuretji parnoki mabentsü, ta JAC-isa metetdaktsüogo.
Dec. 8, 2016 nü open market aser mills dang yokdoktsü atema FPS atema aruba PDS jang bosta tasen nung tanaben sepbangba inyakyim JAC-i putet. Iba mapang godown anaprong nung manager aser staff temi ozüng alema mapa inyakba nangzüka liasü. Iba onük ya ACAUT-i Sub Urban police station nung benok aser iba sülen district administration aser police-i JAC züngsemtem lia godown tem shibangtsü.
Dimapur kübok colony 13 ji, Signal Angami, Signal bosti, Kevijau colony, Sematilla, Sangtamtilla, Rio colony, Metha colony, Thahekhu village, Kuvihe colony, Viola colony, Lhomithi colony, Nagagaon colony aser Y Zhimo colony tem lir.
Dimapur Police-i metetdaktsür
Dec. 9, 2016 nü Sub Urban Police Station, Dimapur nung ACAUT züngsem Hukiye Yepthomi-i FIR ka benokba nung ACAUT Nagaland-i Lomithi Colony, Dimapur nung aliba M/S Lotha Trading Agency indang go-down nung FCI jang white synthetic bosta 500 aser jute bosta 3500 aliba angu ta shia lir, ta Addl. Dy Commissioner of Police/PRO, Dimapur sangdong ka nung metetdaktsü.
PDS jangji synthetic bosta temesüng nung sepbanger mangur ta FCI-i ashir, anungji sensakertem nem agütsütsü aruba jangji open market nung yokdoktsü atema bosta tanga nung aseper aser Tinku (M/S Lotha Trading Agency)-i ozüng alema mapa inyaker, ta FIR nungsa shia lir.
Ano, kasa nisungi tanga FIR ka nung, Kevijau Colony, Dimapur nung aliba M/S R.Z.Lotha indang godown nung FCI jang synthetic bosta 3500 nung sepbanger aliba aser FCI indang jute bosta 18500 nung jang aliba angu, anungji Nirmal Jain (M/S R.Z.Lotha)-i ozüng alema mapa inyaker ta zülur agütsü, ta Dimapur Police sangdong nungsa shia lir.
FIR ana nungji ajemdaker Sub Urban Police Station nung December 8 nü ken o ka benok aser kasa anogo nung Go-down anaprong shibangtsü aser December 11, 2016 nü Go-down ana ketdangsüa repranger Mintu Tiwari ta ser nisung ka puogo. Ajisüaka, FIR nung tai tonglokja alir tanüngba nisungtemji Dimapur nung mali.
Iba onük asoshi December 11, 2016 nü M/S Lotha Trading Company (State Stockist, Food & Civil Supplies, Nagaland) nungi R.Z. Lotha-i Sub Urban Police Station nung FIR ka benok. December 9 nü nisung 40-70 shi kati Kevijau aser Lhomithi colony tem nung aliba pa indang Go-down telungi ozüng alema ai ta pai benokba FIR nung shia lir.
Ozüng alema godown telungi aiba aser iba ken o bushisüngdangba dak sendakba nung December 12 nü nisung asem apu. Par asemji, Joel Nillo, Simon Kelio aser Hukiye Yepthomi nungertem lir ta jangjaogo.
Ano, December 12 nü Dimapur kübok colony 13 nungi teshimtet nübotemi Go-down kiburtem aser benoka aliba onüktem pusema Sub Urban Police Station nung FIR ka benok aser tanü benokba FIR ji taoba mapang benoka aliba FIR tem den külemi lokteper bushisüngdangtsü, ta Dimapur Police-isa metetdaktsü.
Dimapur Police tsüngdang benokba ken o ajak agizüka bushisüngdangtsübaji ozüngi tuyuba teinyaktsü ka lir aser ozüngji nisung ajak asoshi kasa dang lir. Iba tangatetba nung ajemdaker ken o benokba aser bushisüngdang ajak kasa dang inyaka aodar, ta parnokisa shisem.
Ajisüaka, public aser civil society teloktem kechi onük atema südir süaka, pei ket nung ozüng amer aser ozüng amertem ama mapa meinyaktsüla. Loktiliba nung civil society temji kanga dang tongtipang shilem lir saka parnoki ozüng kübok dang inyaksangshitsüla aser ozüng alema inyakra, parnok ozüng tapet agi merenshitsüsa akümtsü, ta Addl. Dy Commissioner of Police/PRO, Dimapur-isa ashi.