Police-i aibelena nisung kasetba sülen longkak aiter

Sacramento, Metsüremi31 (Agencies) : California nung tanak nisung ka tenüng agi Stephon Clark police-i kaset ta kuli jangjaba sülen state yimtiba nung nisung 200 tema adenshir mit adoka longkak ait.
Longkak aitertemji city hall nung adenshir tasüsang arishi küm 22 tain tenüngji ayimdena nokdak ajiser Old Sacramento tsütsüi tetsüng agi longkak aita aru.
Longkak aitertemji karbo ‘megaphones’ bener liasü aser tekaj sü tanak agi meyibanger “Onoka kasetang” ta ayimden.
Longkak aitertemji highway kati aotsü lia police 80 den California Highway Patrol officer-temi nokdanga ayu.
Police-i tanak nisung aika kaseta arudagi aser tang tesüsaba nung Clark kasetogo; iba ama aibelenba ajanga United States tesem aika nung longkak aita arur.
Tanur ana tebu Clark ya par tetsü-tebou’er kisalen police-i kaset; nisung kari ki kichiba raksatsüdar ta police nem osang agütsüba sülen police-tem tonga ao.
Police osang ajanga ashiba agi, officer shirnoki Clark dak injang 20 kahloktsü, parnoki pa ket nung prangpong bena liasü ta arendaka bilem saka pai bena alibaji prangpong masü cellphone liasü ta tesülenang jangjatet.
Tang ‘private autopsy’ ajanga putetbaji tamalen police-i ashiba den balala liasü; injang ka dang pa temang tejaklen kahloktsüba maliasü, ta autopsy ajanga jangjaogo.
Clark dak terongdonglen trokben, tesa nung ken aser tetsüng nunga ken ta injang kahloktsüba autopsy ajanga kuli nguteta lir.
Stephon jagi police anema apusoa parnok nem lendong agütsütsüsa maliasü saka police-i mebilemdangi kasetogo anungji pa kasetbaji tasüngdangtsü tulu lir, ta Clark’er kinünger atemaokatsür tenüng agi Benjamin Crump-i metetdaktsü.