Police-i Bangladesh nung telungpur atsükoka aliba tesem mita ao

DHAKA, March 24 (Agencies) : Bangladesh anüdoklentip tsütsü anüdoklen aliba yimti nung tanü Hokolbarnü police-i ki punguben atongtepa sür aliba ki ka nung telungpur atsükoka lir ta temulung melemi bilema mita aoba mapang injang aser bomb ola kanga bulua angashi.
Bangladesh yimtiba Dhaka nungi kiralongrartem anema rarartem telok kati Sylhet tesem nikongdang 3:00 ako meta longbang.
“Telungpuri ma ta nokdakba ajanga tanep nungi bomb aser injang ola angashir,” ta osangbener kati ashi.
“Iba telok nungji tetsür telungpur dena aliba onoki jangjaogo. Iba tesem nungi telungpur meshimeshia aridoktsü asoshi sentong yanglua lir,” ta Sylhet police commissioner Golam Kibria-i ashi.
“Iba ki nung kibong 12 tashi lir. Anungji tai maketba, item nüburtem meyirutsütsü meranga onoki kanga kümdanga mita aoer,” ta ketdangsertemi osangbenertem dang ashi.
Police-i, item ya neo-Jamaatun Mujahideen Bangladesh (neo-JMB) telungpur asütsü. Iba telok ya Islamic State den sendaktepa lir aser July ka nü Dhaka café nung lendong agüja bendanger nisung 17 dena nisung 22 tepsetba mapa to parnoki inyak, ta ashi.
Tawa police headquarter ajanga telungpur ta temulung melemi bilemba tenüng 500 shi district police tekolakpur nem agütsüogo. 2013 küm nungi linük nung lokti aliba tesem, bendanger aser tamangba tsütsü nütsüng yongsük ajema aliba nüburtem amakba lendong ataloka arur.
Dhaka café nung lendong atalokba sülen linüki kiralongrartem anema kanga sashia mita aoba inyakyim ka tenzük.