Police-i Kiku Sharda ‘Comedy Nights With Kapil’ nung adoksang pur chiokogo

New Delhi, Jan. 13 (Agencies) : ‘Comedy Nights With Kapil’ nung adoksang Kiku Sharda, pa dang ‘Palak’ taka ajar, pai Dera Sacha Sauda tongti Gurmeet Ram Rahim Singh jilu aiba atema aija Kaithal, Haryana nung police-i tanü apu aser pa anogo 14 tepoukdak ayutsü ta metetdaktsü saka ghonda ishika dang lirbo bail nung chiok.

Kiku-i par tamangba nung temulung yirutsüsa jilushi aiba ajanga police apu.

Anogo 14 nü atema tepoukdak ayutsü ta Chief Judicial Magistrate, Kaithali, Nandita Kaushik-i metetdaktsüogo.

Haryana Police-i Mumbai nung December 31, 2015 anogo nung under section 295 A of the Indian Penal Code (Tamangba yimsü mezüngmeshiba) kübok ajemdaker Kiku aputsü ken o benok aser Kiku ken oji Uday Singh ajanga police ket nung agütsü.

‘Ni sapang nung julishir ka dang lir aser onok lenir (Director)-i kechi onük aitsü ashir ibaji inyaker’ ta Kikui-i taitatok meshia osangbenertem den jembidang metetdaktsüogo.

“Ni pa mesükba süoshi asem aser lenir-i agütsü olongtem dang zünga jilushiji ai” ta Kikusa shisem. Ni neburtem temulung peladaktsütsü dang jilushir saka tamangba yimsü tsütsü kardanga temulung raksatsütsü ta tebilemba nung jilushir masür” aser yaküm December ita-a Kiku-i Twitter ajanga taitatok meshiba Kiku-isa shisem.

Kiku-i December 27, 2015 anogo nung TV show ajanga onok tamangba yimsü nung kanga mejungi kongshidaktsüogo ta Dera pusemer teloki aija metetdaktsü.

Kiku ya reality show ‘Comedy Nights With Kapil’, Sunil Grover, Ali Asgar, Upasna Singh aser Chandan Prabhakar amala nung kanga nüngtuka süa shilem agir.

Tanü nikongdang Haryana local court ajanga jilushir Kiku Sharda tepoukdak ghonda ishika lir kelen sen Rs. 1 lakh agütsür bail nung anizükogo ta metetdakjtsüogo.