Police-i shi nung tangar memenepertem züka merenshi

Guwahati, Mongputeni (October) 5 (Agencies): Guwahati nung tanü police-i meimchir temeten anema mapa tulu ka inyakogo aser ibaji shi nung tangar memenepertem dak teka sangshiba lir.
Tanü Dispur nung shi nung tangar memenepertemi takhangba agüja lungkak aitba sentong ka agidang iba lendong atalok.
Persons with disabilities (PwDs) atema inyakba telok Pratibandhi Suraksha Sangstha-i ayongba sentong nung nisung 1200 shi ka adenshia shilem agi. Parnoki persons with disabilities atema lemzükja aliba mapa tazüngtem nung nisung shimokang ta takhangba agüja lungkak ait.
Ajisüaka, police-i parnok dak züka merenshidang nisung 10 shi- Nripen Malakar, Amit Basumatary, Ranjit Chetry, Bikash Pegu, Sanjay Sinha, Himangshu Nath aser Rejajul Haque nungertem kanga mejungi yiru.
Iba tatalokba nung Pratibandhi Suraksha Sangstha nung tongti tezülur Nripen Malakar kanga mejungi yiru aser Amrit ta ser nisung ka teka sükdang.
Police-i yiruyibongertem mozü kidangi anir mao saka pur Kahilipara nung aliba 4th APBN office-i anir ao, ta Malakar-i osangbener dang ashi.
Assam police-i mapa tamajung inyaker aika meputeter aser iba atema parnok aija arur, saka tanü parnoki mapa tamajungtiba inyakogo. Tanü parnoki kanga tasütait sayua yimdong nung shi nung tangar memenepertem dak züka sayuogo, ta rights activist katia osangbener dang ashi.
State sorkar kübok department balala nung differently-abled persons atema mapa 4,419 lemzükja aliba nung nisungtem shimang ta parnoki tanü tongti takhangba agüja lungkak ait.
Tanabuba takhangba onükji, taoba mapang sorkari nangzükba ama senotsü teyari agütsütsü atema lir.
Taküm April ita parnoki social welfare department ketdangsertem den jembitepba sülen Dispur nung recruitment drive alitsü atema shidi ka agütsü. Saka sorkari tanü tashi iba shidi atema mebilemtsür, ta Malakar-isa ashi.
“June 1 nü onoki social welfare minister Pramila Rani Brahma den ajurutepa senden ka amen aser onok takhangbatem metetdaktsü. Ajisüaka onoki ashiba onüktem züluoka mayu aser iba jagi senden aika menaka recruitment drive atema mapa kecha meinyaker” ta Malakar-isa shisem.