Police-i Uganda Opposition lenisang, Besigye apu

Kampala, February 15 (Agencies): Uganda police-i Uganda opposition telok lenisang, Kizza Besigye tanü, Hombar nü apuba osang ka metetdaktsüogo.

Besigye-i Kampala yimtiba nung tan hopta agitsü ayongba Tir election den sentakba election nüboyimtsü sentong ka nung shilem agia alidang police ketdangsertem arua pa apuba osang jangjaogo.

Ajisüaka, Besigye-ji kechi ken o nung ajemdaker apu iba osangbo memetetdaktsüi lir.

Uganda Tir, Yoweri Museveni-i aniba sorkar kanga sashia anemsang, Besigye ya taoba mapang nunga aiben puoka tepuokdaki yokba osang bushiteta lir.

Uganda nüburtemi tan Brehostibar nü par vote agüja Tir, parliament aser yimsüsürtem shimtsü sentong renema lir.

1986 küm tashiyim agi yimsüsütsü menden agisang, Museveni-i 2006 aser 2011 na nung agiba Tir election nung   takok ngua tang Tir menden tebendak lir.

Besigye-ia tan agi pezüben buba asoshi Tir menden atema election nung candidate ka ama tokteper lir.