Police-i Union Tourism Minister Prahlad Singh’er jabaso apu

New Delhi/Bhopal, AamiJune 19 (Agencies): Madhya Pradesh kübok Narsinghpur district nung nisung tepsettsü merangba atema Union Tourism Minister, Prahlad Singh’er jabaso den par kinünger ka police-i puogo.
Osangbenertem den jembidang Superintendent of Police, Karan Singh-i, “Hombar aonung Behli Bazaar anasa telok ana tsüngda rara adok. Ola adoka raratepba sülen injang agi nisung ka yirutsü. Parnokisa police ka dak azük. Osang angazükba agi telok ana tsüngda akhidang nungi mangatettep ka liasü,” ta metetdaktsü.
“Iba ken o nung Prabal Patel aser Monu Patel nata tanga nisung 18 den densema lir, aser IPC kübok Arrla 307 nung ajemdaker parnok anema FIR ka benokogo. Tai tonglokja alirtem aputsü atema team pezü tenteta liasü,” ta paisa metetdaktsü. Injang agi yirusangji Himanshu Rathor lir ta jangjaogo.
Ano Sub Divisional Officer Police, PS Warle-i, “Tongti aibelener Prabal Patel (Union Minister Prahlad’er jabaso) densema nisung trok puogo. Onoki tanüngba nisungtemji-a aputsü,” ta metetdaktsü.
Police-i par jabaso apuba dak sendakba nung osangbenertemi Union Minister Prahlad dang asüngdangba ka langzüdang pai, ozüngi tim teinyaktsü inyaktsü, ta dang langzü.
Prahlad-i, “Iba ya tai maka tatalokba. Ozüngi tim teinyaktsü inyaktsü. Ni iba dak alia kecha mejembiner,” ta ashi.
Ano Prahlad’er adianu, Jalam Singh Patel-i, “Iba tatalokba mapang nung ozü jabaso Monu, Jabalpur nung liasü aser Prabal-a jila nung maliasü,” ta ashi.