Police ketdangser kati Pul asüba bushisüngdangtsü: Pema Khandu

Itanagar, August 14 (Agencies): Arunachal Pradesh Chief Minister, Pema Khandu-i IGP jenjang dang tekübokba masüba police ketdangser ka leniba nung taoba state Chief minister, Kalikho Pul soseta asüba bushisüngdangtsü tuyuogo.
Yashi state yimtiba nung Chief Secretary Shakuntala Doley Gamlin, DGP S Nithianandam aser Principal Secretary (Home) Satya Gopal nunger den temaba jenjang nung senden ka mena state nung tzüzüng ozüng tensa reprangshiba senden nung Khandu-i iba o jembi, ta tanü Chief Minister’s office sangdong ka ajanga ashi.
Khandu-isa police dang Pul asüba bushisüngdangba maparen tekaraba nung inyaktsüla aser akokba tashi agi mapang tatsütiba nung tembangtsüla ta shiogo.
Ajisüaka iba bushisüngdang anitsü atema IGP tenüng sangdonga mali.
Yaküm December ita nungi state yimtenren nung makmakshishi aliba sülen taküm February 19 nü Congress nung mulung masüba MLA, Pul ya state Chief Minister aküm. Ajisüaka taküm July 13 nü Supreme Court-i obendang ka agütsüba nung ajemdaker pai chief minister menden toktsü.
Supreme Court-i tanaben Nabam Tuki Chief Minister akümtsü melaba sülen anogo ana lir Tuki-i Pema Khandu nem chief minister menden agütsütsü atema sodi meshi.
Ano külen taküm chief minister Nabam Tuki agiener Kalikho Pul CM kümdaktsüba mangatettep ken o nung dena alisang Arunachal Pradesh Angh, Jyoti Prasad Rajkhowa temang mejungi aliba ajanga hopta trok sodi agia liasü aser yashi pai maneni Angh mapa agizükogo.
Rajkhowa tongtibang operation ka agiba ajanga sodi nung liasü, iba mapang Tripura Angh, Tathagata Roy-i Arunachal Angh repsema inyaka liasü.
Yashi Khandu-i Raj Bhavan nung Angh, Rajkhowa ajurua pa lenisüba kübok nung state sorkari nüburtem teimla ataloktsütsü imlar, ta shiogo.