Police telok 2 NSF asayamong semifinal-i iogo

NSF asayamong 2 buba quarterfinal asaya nung Match Patron, Neinguvoto Krose-i asaya ketdangser aser asayartem den aroki agiba noksa ka yangi angur. (Kohima, October 17)

Kohima, October 17 (TYO): Tang Kohima nung tasayadak 17 buba NSF Martyrs’ Memorial Trophy asayamong mezüngbuba quarterfinal asaya 2 nung takok ngua, police telok 2 – Nagaland Police (Blue) aser (Red) nati semifinal asayatsü jenjang tanü, Hombar nü ajangzükogo.
Tanü mezüngbuba asaya nung Nagaland Police (Blue) teloki goal 1-0 agi Senapati Football Club telok tsükdaktsü.
Ninja Gongmei-i penalty ball takok ngua metsüokja, par Blue telok asoshi takokba goal-ji asaya tenzüker minute 42 buba nung agütsü.
Tanabuba quarterfinal asaya nung Nagaland Police (Red) teloki goal 9-0 agi Asüpfü Christian Institute, Mao Gate telok madak ajemshia takok angu.
Tanü asaya tenzüker minute 25 aser 26 buba na nung Limakümzük aser Saku nati goal kaka agüja, par Red telok temaba jenjang nung ajungkettsüba sülen Ratobe-ia minute 39 buba nung goal 1 agüja, par telok jenjang maneni tajungba kümdaktsü.
Red midfielder, Kekhrie-ia minute 42, 45, 67 aser 69 buba nung goal 4 tashi agütsüba sülen tan asayamong nung hat-trick yanglur asayar 13 buba aküm.
Tesülen, Limakümzük aser Lipok nati asaya tenzüker minute 79 aser 82 buba na nung 8 aser 9 buba goal agüja, par Red telok nem takok ngudaktsü.
Tanü takok anguba sülen Blue aser Red telok na tsüngda tan October ita 19 nü semifinal asayatsü lemzükogo.
October 18 nü asaya yamai alitsü:
1. Barak FC vs Teima-Khe Kidima @ 12:00 Noon
2. Forerunners’ FC 4th NAP vs P. Vizheto FC, Dimapur @ 2:00 PM