Police tim mesüi shimba mapa Congress lanurtemi aitsür

Kohima, Aug 19 (TYO) : Nagaland police department nung police inyaktsü shimba maparen nung tim mesüi tezülen nungi shimba mapa Nagaland Pradesh Youth Congress (NPYC) teloki kanga sashia aitsüogo aser tangsa item mapa atemaji tatidang agitsüla, aji ta mesüra September 1 nungibo longkak ait tenzüktsü ta parnokisa metetdaktsüogo.
Congress lanurtemi ashiba agi, parnoki kasa onük nung angh nem tezüluba ka July 29 nü agütsü, ajisüaka tanü tashi angh nungi iba atema telangzüba kecha mali.
Anungji, police department nung police paikaji meshitaki shimba maparen anemaji Nagaland angh-i tapet mapa karbosa inyaktsü imlar ta tanü angh dangi kasa onük nung nenshia züluba shiti ka nung NPYC president Hitilo Tep aser general secretary (admn.) Akum Pongen nati metetdaktsü.
NPYC purtemi July 29 nü Nagaland angh, P B Acharya dangi züluba shidi nung ashiba agi, police department nung 2013 küm nungi tang tashi nung tatidang (interview) kena magidangi pei shimnütsü shima lir.
Parnokisa ashiba agi, Nagaland nung azüngtsü aser zülutsü metetba purtem 82% lir aser zünger mapa bushirtem rongnung nisung meyirijang 70 register süa lir aser ano lanurtem paikaji register masüba purtem alitsü.
NPYC-isa tang NPF teloki aniba DAN sorkar aija ashidang, akhidangbo police department nung grade III & IV nung inyakertem shimtsü asoshi osangkakettem nung advertisement agütsür külena tezüluba aser tebang o agidang langzüdaktsütsü saka item tim teinyaktsütem ajak agi asenok lakteter tebenshia mebenshia aru.
” Gazette posts asoshia kecha tatidang magi mashilen nungi aika shimogo aser parnokji Nagaland Public Service Commission majangi state cabinet purtemi dang regularize sütsüogo,” ta NPYC-isa aitsü.
Parnokisa ashiba agi, 2013 küm nungi tang 2015 küm tashi Nagaland Police department nung tim mesüi shimer ajak agi Constables 959, ASI 19 aser UBSI aser LDA 7 liasü. Parnok ajak ya District Executive Force, Nagaland Armed Police battalions, Police Training School aser Nagaland Armed Police Training Centre nung inyaktsü atema interview dena magi shimba liasü.
NPYC-isa NPF teloki aniba DAN sorkar nung nisung shitakba mali ser shimba taila inyakertem aika lir aser ano nisung karbo mapa ka nung dang masü saka ano tanga office nung dena repesema inyakdagi ta aja metetdaktsü.
NPYC-isa police department nung police asütsü asoshi interview magii tezülen nungi shimba purtemji ajak katitsüla aser post ajakji tontepa tatidang agütsü shimtsüla.
State sorkar kübok department ajak nung inyakertem meshitaki shima lir, anungji itemji bushisüngdanga inyaktsü asoshi retired Judge ka tekolak ser High Power Committee (HPC) ka shimtsüla ta Congress Youth purtemi takangba metetdaktsüogo.
NPYC-isa ashiba agi, NPSC ajanga tatidang agitsü menüngdakba purtem Grade III & 4 shimtsü asoshi “Service Selection Board” nem tashi agütsütsüla.
Nagaland police department nung meshitaki shimba purtem ajak agiener tatidang shitak agi shimtsü asoshi tim mapa metenzükra, September 1, 2015anogo nungibo longkak aittsüsa akümtsü ta NPYC telokisa metetdaktsüogo.