Political party tem dang nungibo osang kakettemi mapa tajungba inyaker

Dimapur, Luroi (August) 29 (TYO): Nagaland Angh, P B Acharya-i tanü ashiba agi, Nagaland nung osangkaket adoktsübaji mapa tasak lir saka political party tem dang nungibo osangkakettemi ang mapa tajungba inyaker.
Ajisüaka, state kübok aliba kinük kisang tesem ajak nung osangkakettem mapang shitak nung matonger. Iba ya gari lenmang junga maliba ajanga lir ta Acharya-isa ashi.
State nung Nagaland Today ta ser osangkaket tasen ka indang office building lapoktsüba sentong nung Acharya-i o jembidang iba olen lemsatep.
Tangalen alirtemibo Nagaland tesem ya telungpur khuret tulu aliba state ka ama dang züngshir. India tesem balala nung nisungtemi Northeast India tesemtem metettsü atema jangra mali aser iba atema sasa bilemer, ta Governor-isa shisem.
“Alima dang asenok (Naga nunger) dak aketba tajungtem mesayutetba ajanga asenoki tamakok ajuruogo. Sobaliba, yimsü yimbong aser kin tajungtem lir,” ta Acharya-isa ashi.
Iba olen nung ajemdaker pai media temi shilem tongtibang ka inyaktsü aliba indang shisem.
Acharya-isa ashiba agi, India indang state tongti ka akümtsü atema Nagaland dak tashi lir. Tongtibangsa, asenoki Nagaland kinük kisang tesem nung aliba nüburtem tonga aotsüla. Asenoki khuret nungi jena aoba ajanga khuret mokoktettsü.
Paisa, yimtsüng nung aliba nüburtem libaliro aser education system tajungba kümdaktsütsü atema nendaka inyaktsü ayongzük.
Lokti kaji takum asünungji tajangzükertemi agütsütsüla, ta Nagaland nung aliba lanurtem züngdemba sülen state toktsür tangaleni aoba nung ajemdaker Acharya-i iba olen ya ashi.
Iba den medemdanga Acharya-isa ashiba agi, state kübok tesem blalala nung NGOs-i nüburtem nem maongka agütsütsü melena item tentet yagi pei ajangzüktsü atema ang inyaker.
Taoba mapang Mon district nung school ka semdanga liasü aser pai semdangba anogo nungang tanurtem nem mid-day meal chiyongdaktsüba indang Acharya-isa lemsatep.
State dangi mid-day meal atema New Delhi nungi senotsü peria yokaka, iba tashi ataloker ta, paisa shisem.
“Asen timtemji asen sasa bentettsüla. Shingaia asenok atema aruagi meinyaktsütsü,” ta Acharya-isa shisem.