Politics ji akhüm maket mapa:Raveena Tandon

Gurgaon, May 13 (Agencies) : Bollywood actress Raveena Tandon ya küm 25 shi film industry nung shilem agia arur aser lai lokti ajungtsü atema teti ola adoker.
Kü den külemi shilem agirtem Govinda aser Shatrughan Sinha na ama nibo politics nung majemoktsü kechiba süra iba mapaji aküm maket mapa lir, ta lai ashi.
Raveena ya tang  “Maatr – The Mother” film tangokzükli lir aser lai politics ya la atema masü ama bilemer.
“Ni politics nung tangbo majemoktsü. Politics nungji mapa tajung inyaknüaka meinyaktetsü tensa aiben arur,” ta Ashtar Sayyed-i direct asüba film tangokba tesem nung Raveena-i ashi. Iba film ya Brihostibarnü tangokzük.
“Satta” film nung politician ka ama shilem agila Raveena-i, “Küm 10 tejakdangbo yimsüsürtem aser ketdangsertem kanga akümtsübua liasü, ajisüaka tangbo parnok yimsüsür o yimsüsür na social media ajanga ajaki meteta aitsüba lutsütepba ajanga akhüm kanga maket akümer,” ta ashi.
“Parnok lutsütepba ya tesembatsüka lir. Anungji iba mapa ya akümtsübutsü madoker,” ta lai shisem.
“Slumdog Millionaire” film nung shilem agisang Madhur Mittal-ia “Maatr – The Mother” film nung tetsürtem temeten nokdaker ka ama shilem agia lir.
Linük nung tetsür dak tim masüba mapa inyakba kanga buluba ajanga lai, lanur ozüng alema benshirtem küm khen atsüshitsüla ta ashi.
Lai, “India nungbo lanur aibelener arishi küm 18 nungi ang tepuokdak aser iba kübok purbo tanur ta shia odang yutsür, ajisüaka joko linük timba ka nung lanur arishi küm 14 nungi tenzüka ozüng alema aibelenertem tapuokdak ayutsü yanglushiogo,” ta shisem.
Ni tasüba agi merenshitsü akhanger masü ajisüaka nisung kaji pei tai alang ozüng nung aliba ama merenshitsüla aser lanur atema kümji khen atsüshi nung ajungtsü ama bilemer, ta laisa ashi.
“Maatr – The Mother” film ya kodang sayatsüar ano osang tejangja kecha mashi.