Politics nungbo teti medemera mali aser tsükchira mali: Nüklutoshi

Mokokchung, May 20 (TYO): Politics nungbo teti medemera mali aser teti tsükchira mali, khenkhen alutsü aser khenkhen atutsü aser ibaji yimya dang, ta Adviser to Chief Minister aser Mokokchung Incharge Nuklutoshii metetdaktsü. Pai iba o ya Honibarnü Naga People’s Front (NPF) Mokokchung Division telen balala nungi party lenirtem den divisional office nung telungjem mensem ka amenba mapang ashi.
12 buba Legislative Assembly nung yipru mopung tulu arua kümsük (tenure) tepiyong tensa majung dang ajangshia aruogo aser iba amai timtem tali buluba ya otsüsütsü ka asütsü, ta pai ashi. Iba ama mepetmesü aliba ajanga nüburtema jangratema metenzüktet, saka mapang tensa agi ya dang bener aru nung ajaki angatettsü imlar, ta paisa sasaba olen ka ashi. “Kümsük ka nung Chief Minister asemben tashi melenba ya koda, anungji, iba ya tia maka tenure ka asütsü”, ta paisa shisem.
Paisa ashiba agi, ita trok tsüngda bye election-ji agitsü/magitsü ta asübaji tang tashi election commission nungia tetuyuba tejangja ka arua mali, aji saka, Dr. Shürhozelie-i bye election nungji metoktepra pai elected member kar nem CM mendenji agütsütsüsa akümtsü. Aji ta kodang südir iba tenure nung CM pezüben melener asütsü, ta paisa ashi.
“Taremzüker temoatsüba” ta ashiba ama, timtem khuret jenti ajuruaka item ajakji aremzüka party nükjidong shitak yur ochishia inyaktsü asoshi paisa party tenzükertem ajungshia liasü. “Asenoki aremzükdi, kenü anü tasen adoktsü yongya atadi”, ta paisa teimla o ka shiogo.
Yimya agi, “politics nungbo teti medemera mali aser teti tsükchira mali, khenkhen atutsü aser khenkhen alutsü aser aji yimya dang”, ta party pur dang temulung ajema malitsü asoshi olen ka ashi. Aji oda, “shirnok party nungi atsüngzüka lir, item purji anioka taruba 2018 election-ji kodasür takok tajung angutsü ta asüba nükla yur inyakdaktsünür”, ta paisa ayongzüka liasü.
“Party atema ni kangki nung metaogo aser ni party atema bendanga agütsüba ajanga tanü ni iba jenjang nung lir”, ta osangbener senden ka nung Nüklutoshii jembidang ashi.
Iba osangbeneri, “tawa regional party tasen ka tentetba jagi NPF nung tapok apatsü asü?” ta metetnüa asüngdangdang, “iba jagi NPF nung timtem kecha malitsü”, ta langzü.
“Taruba election nung shir teloki sorkar yanglutsü amai bilemer?” ta metetnüa asüngdangdang, “Party-i ticket-ji koba yimya nung alemer aser lenir (CM asütsü) shiba shimer ta asüba dak tulu keta lir, kechiyong ibaji kanga tongtibang lir” ta ashi. “Tang tashibo tanga party dang nungi NPF sa jenjang tajungba lir, anungji, taruba election nunga NPF-isa sorkarji akümtsü asoshi meranga inyaktsü”, ta ashi.
“NPF telungtet nung telemsa lir mali?” ta asüngdangba ka langzüdang, “onok tsüngda melungjemba ajanga iba tenure tepiyong timtem aika ajurua aruogo, tang yaa tema nungbo lungjemer amai sayur saka kangabo mesüngjemteti lir”, ta paisa ashi.